சவூதி அரேபியாவின் ரியாத் விமான நிலையத்தில் இடம்பெற்ற அண்மைய பாதுகாப்புச் சம்பவத்தைத் தொடர்ந்து, ரியாத் நகருக்கான அனைத்து விமான சேவைகளையும் ஒக்டோபர் 18ஆம் திகதி வரை தற்காலிகமாக நிறுத்தியுள்ளதாக ஸ்ரீலங்கன் எயார்லைன்ஸ் அறிவித்துள்ளது.
பயணிகளினதும் விமானப் பணியாளர்களினதும் பாதுகாப்பை உறுதிப்படுத்தும் நோக்கில் இந்தத் தீர்மானம் எடுக்கப்பட்டுள்ளதாக விமான நிறுவனம் தெரிவித்துள்ளது.
தற்போது பாதுகாப்பு நிலைமை மற்றும் விமானச் செயற்பாடுகள் தொடர்பான மதிப்பீடுகள் முன்னெடுக்கப்பட்டு வருவதாகவும், வர்த்தக விமானச் சேவைகளை மீண்டும் ஆரம்பிப்பதற்கு ஏற்ற சூழல் உறுதிப்படுத்தப்பட்ட பின்னரே சேவைகள் மீள ஆரம்பிக்கப்படும் என்றும் நிறுவனம் குறிப்பிட்டுள்ளது.
பயணிகளுக்கு முக்கிய அறிவிப்பு!
விமானச் சேவைகள் தற்காலிகமாக நிறுத்தப்பட்டுள்ளதால் பாதிக்கப்பட்ட பயணிகள் மேலதிக தகவல்களைப் பெற்றுக்கொள்வதற்காக ஸ்ரீலங்கன் எயார்லைன்ஸ் நிறுவனத்தையோ அல்லது தங்களது பயண முகவர்களையோ தொடர்புகொள்ளுமாறு அறிவுறுத்தப்பட்டுள்ளனர்.
பயணிகளினதும் விமானப் பணியாளர்களினதும் பாதுகாப்பே தமது முதன்மையான முன்னுரிமை என ஸ்ரீலங்கன் எயார்லைன்ஸ் வலியுறுத்தியுள்ளது.
ரியாத் விமான நிலையத்தில் இடம்பெற்ற பாதுகாப்புச் சம்பவத்தின் தன்மை தொடர்பான மேலதிக விபரங்களும், விமானச் சேவைகள் மீண்டும் ஆரம்பிக்கப்படும் திகதி குறித்த உறுதியான தகவல்களும் எதிர்பார்க்கப்படுகின்றன.
