சிறைத்தண்டனை அனுபவித்து வரும் கலகொடஅத்தே ஞானசார தேரரின் விடுதலையை வலியுறுத்தியும், பௌத்த பிக்குகளின் மத உரிமைகளைப் பாதுகாக்கக் கோரியும் மகா சங்கத்தினரின் தலைமையில் ஆரம்பிக்கப்பட்ட நடைபயணம் இன்று (12) மூன்றாவது நாளாகவும் தொடர்கிறது.
கடந்த ஒக்டோபர் 10ஆம் திகதி கண்டி ஸ்ரீ தலதா மாளிகைக்கு முன்பாக ஆரம்பிக்கப்பட்ட இந்த நடைபயணம், எதிர்வரும் ஒக்டோபர் 15ஆம் திகதி கொழும்பைச் சென்றடையத் திட்டமிடப்பட்டுள்ளது.
📍 இன்று வரக்காபொல நோக்கி நடைபயணம்!
நடைபயணத்தின் முதல் நாள் கடுகன்னாவ பகுதியிலும், இரண்டாவது நாள் கேகாலை நகரத்திலும் நிறைவடைந்ததாகத் தெரிவிக்கப்பட்டுள்ளது.
இதற்கமைய, இன்று கேகாலை நகரத்திலிருந்து மீண்டும் ஆரம்பமாகும் நடைபயணம், வரக்காபொல நகரைச் சென்றடையவுள்ளது.
தொடர்ந்து நிட்டம்புவ மற்றும் கடவத்தை உள்ளிட்ட முக்கிய நகரங்களைக் கடந்து கொழும்பைச் சென்றடைய ஏற்பாட்டாளர்கள் திட்டமிட்டுள்ளனர்.
⚖️ எதற்காக இந்த நடைபயணம்?
சிறைத்தண்டனை அனுபவித்து வரும் ஞானசார தேரரின் விடுதலையை வலியுறுத்துவதுடன், சிறைத்தண்டனை பெறும் பௌத்த பிக்குகளின் மத உரிமைகள் தொடர்பான கோரிக்கைகளையும் முன்வைக்கும் நோக்கில் இந்த நடைபயணம் முன்னெடுக்கப்படுகிறது.
இந்த விவகாரம் தொடர்பில் மகா சங்கப் பிரதிநிதிகளுக்கும் ஜனாதிபதி அநுர குமார திஸாநாயக்கவுக்கும் இடையில் அண்மையில் கலந்துரையாடல் நடைபெற்றிருந்தது.
சிறைத்தண்டனை பெறும் பௌத்த பிக்குகளைச் சிறைச்சாலைகளிலிருந்து வெளியே அழைத்துச் செல்லும்போது பின்பற்ற வேண்டிய நடைமுறைகள் தொடர்பில் புதிய விதிகளை அறிமுகப்படுத்துவதற்கான நடவடிக்கைகள் முன்னெடுக்கப்பட்டு வருவதாகவும் ஜனாதிபதி ஊடகப் பிரிவு தெரிவித்திருந்தது.
இந்த நிலையில், நடைபயணம் இன்று மூன்றாவது நாளாகத் தொடர்கின்றமை குறிப்பிடத்தக்கது.
