இந்திய கிரிக்கெட் அணியின் முன்னாள் தலைவர் மகேந்திர சிங் தோனி தொடர்பான ₹100 கோடி மானநஷ்ட வழக்கில், அவரது வாக்குமூலத்தை வீடியோவில் பதிவு செய்வது தொடர்பாகத் தாக்கல் செய்யப்பட்ட மனுவுக்குப் பதிலளிக்குமாறு தோனிக்கு சென்னை உயர்நீதிமன்றம் உத்தரவிட்டுள்ளது.
ஓய்வுபெற்ற ஐபிஎஸ் அதிகாரி சம்பத்குமார் தாக்கல் செய்துள்ள இந்த மனு மீதான விசாரணையை, எதிர்வரும் ஒக்டோபர் 29ஆம் திகதிக்கு நீதிமன்றம் ஒத்திவைத்துள்ளது.
⚖️ 2013 ஐபிஎல் சூதாட்ட விவகாரத்தில் தொடங்கிய வழக்கு!
கடந்த 2013ஆம் ஆண்டு இடம்பெற்ற ஐபிஎல் சூதாட்டம் தொடர்பான வழக்கு குறித்து தொலைக்காட்சி விவாதமொன்றில் தமக்கு எதிராக அவதூறான கருத்துகள் தெரிவிக்கப்பட்டதாகக் கூறி, தனியார் தொலைக்காட்சி நிறுவனத்துக்கு எதிராக மகேந்திர சிங் தோனி 2014ஆம் ஆண்டு சென்னை உயர்நீதிமன்றத்தில் ₹100 கோடி மானநஷ்ட ஈடு கோரி வழக்குத் தொடர்ந்திருந்தார்.
இந்த வழக்கில் தோனியின் வாக்குமூலத்தைப் பதிவு செய்வதற்காக வழக்கறிஞர் ஆணையரை நியமித்து நீதிமன்றம் ஏற்கனவே உத்தரவிட்டிருந்தது.
📹 வீடியோ பதிவு செய்யக் கோரிக்கை!
இந்நிலையில், தோனியின் வாக்குமூலத்தை வீடியோவில் பதிவு செய்ய அனுமதிக்குமாறு ஓய்வுபெற்ற ஐபிஎஸ் அதிகாரி சம்பத்குமார் தரப்பில் புதிய மனுவொன்று தாக்கல் செய்யப்பட்டுள்ளது.
அந்த மனுவில், வாக்குமூலம் பதிவு செய்யப்படும் நடவடிக்கையைக் கண்காணிக்க நீதிபதி ஒருவரை நியமிக்க வேண்டும் என்றும், பதிவு செய்யப்பட்ட வீடியோவை எவ்விதத் திருத்தங்களும் செய்யாமல் தமக்கு வழங்க வேண்டும் என்றும் கோரப்பட்டுள்ளது.
மேலும், வாக்குமூலம் பதிவு செய்யும் நடவடிக்கையை ஐந்து நட்சத்திர ஹோட்டல் அல்லது தனியார் பங்களாவில் நடத்தாமல், நீதிமன்றம் அல்லது அரச கட்டடத்தில் நடத்துவதற்கு உத்தரவிட வேண்டும் என்றும் மனுதாரர் தரப்பில் கோரப்பட்டுள்ளது.
🏛️ நீதிபதி எழுப்பிய கேள்வி என்ன?
நீதிபதி ஹேமந்த் சந்தன் கவுடர் முன்னிலையில் இந்த மனு விசாரணைக்கு வந்தபோது, வாக்குமூலத்தை வீடியோவில் பதிவு செய்வதுடன், அதனை அரச கட்டடம் அல்லது நீதிமன்றத்தில் நடத்த உத்தரவிட வேண்டும் என மனுதாரர் தரப்பில் கோரிக்கை முன்வைக்கப்பட்டது.
இதன்போது குறுக்கிட்ட நீதிபதி, நட்சத்திர ஹோட்டலில் தோனியின் வாக்குமூலத்தைப் பதிவு செய்வதில் என்ன பிரச்சினை உள்ளது என்றும், அதற்கான செலவுகளை சம்பந்தப்பட்ட தரப்பினரே ஏற்கவுள்ள நிலையில் அதில் என்ன சிக்கல் என்றும் கேள்வி எழுப்பியதாகத் தெரிவிக்கப்பட்டுள்ளது.
இதையடுத்து, தோனி தரப்பில் பதிலளிப்பதற்கு அவகாசம் கோரப்பட்டது.
📅 ஒக்டோபர் 29ஆம் திகதி அடுத்த விசாரணை!
தோனி தரப்பின் கோரிக்கையை ஏற்றுக்கொண்ட நீதிமன்றம், சம்பத்குமார் தாக்கல் செய்த மனுவுக்குப் பதிலளிக்குமாறு தோனிக்கு உத்தரவிட்டதுடன், வழக்கின் அடுத்தகட்ட விசாரணையை ஒக்டோபர் 29ஆம் திகதிக்கு ஒத்திவைத்துள்ளது.
இந்த வழக்கில் வீடியோ பதிவு தொடர்பான கோரிக்கைக்கு நீதிமன்றம் இறுதியாக என்ன முடிவெடுக்கப் போகிறது என்பது அடுத்த விசாரணையில் தெரியவரும் என எதிர்பார்க்கப்படுகிறது.
