அமெரிக்காவில் நடைபெற்ற 2026ஆம் ஆண்டுக்கான பாராளுமன்ற இடைத்தேர்தலில் ஜனாதிபதி டொனால்ட் ட்ரம்பின் குடியரசுக் கட்சிக்கு பெரும் பின்னடைவு ஏற்பட்டுள்ளதுடன், செனட் சபை மற்றும் பிரதிநிதிகள் சபை ஆகிய இரண்டிலும் ஜனநாயகக் கட்சி பெரும்பான்மையைப் பெறும் என CNN கணித்துள்ளது.
CNN Decision Desk வெளியிட்டுள்ள தேர்தல் கணிப்புகளின்படி, ஜனநாயகக் கட்சி இரு அவைகளிலும் கட்டுப்பாட்டைக் கைப்பற்றியுள்ளது. இதன் மூலம் வாஷிங்டனில் குடியரசுக் கட்சியின் அரசியல் ஆதிக்கத்திற்கு முடிவு ஏற்பட்டுள்ளதாக சர்வதேச ஊடகங்கள் தெரிவிக்கின்றன.
கடந்த 2024ஆம் ஆண்டு நடைபெற்ற ஜனாதிபதித் தேர்தலில் ட்ரம்ப் வலுவான ஆதரவைப் பெற்றிருந்த பல மாநிலங்களிலும் இம்முறை ஜனநாயகக் கட்சி வெற்றிகளைப் பதிவு செய்துள்ளது.
குடியரசுக் கட்சியின் கோட்டைகளிலும் ஜனநாயகக் கட்சி வெற்றி
இந்தத் தேர்தலின் மிக முக்கியமான அம்சமாக, குடியரசுக் கட்சியின் பாரம்பரிய ஆதரவு மிக்க மாநிலங்களிலும் ஜனநாயகக் கட்சி வெற்றிகளைப் பெற்றுள்ளது.
குறிப்பாக, 2024ஆம் ஆண்டு ட்ரம்ப் 18 சதவீத வாக்கு வித்தியாசத்தில் வெற்றி பெற்ற தென் கரோலினாவில் ஜனநாயகக் கட்சி செனட் ஆசனத்தைக் கைப்பற்றியுள்ளது.
மேலும், 1994ஆம் ஆண்டுக்குப் பின்னர் மாநிலம் தழுவிய தேர்தலில் ஜனநாயகக் கட்சி வெற்றி பெறாத டெக்சாஸிலும் அக்கட்சி வெற்றியைப் பதிவு செய்துள்ளது.
1932ஆம் ஆண்டுக்குப் பின்னர் ஜனநாயகக் கட்சியைச் சேர்ந்த ஒருவர் செனட் ஆசனத்தைப் பெறாத கன்சாஸ் மாநிலத்திலும் இம்முறை அந்தக் கட்சி வெற்றி பெற்றுள்ளது.
இதற்கு மேலதிகமாக ஓஹியோ, அயோவா உள்ளிட்ட மாநிலங்களிலும் ஜனநாயகக் கட்சி வெற்றிகளைப் பெற்றுள்ளதாக CNN தெரிவித்துள்ளது.
ட்ரம்பின் செல்வாக்கு சரிவு முக்கிய காரணமா?
இந்தத் தேர்தலில் குடியரசுக் கட்சியின் தோல்விக்கு பல காரணங்கள் முன்வைக்கப்படுகின்றன.
பணவீக்கம், ட்ரம்ப் நிர்வாகத்தின் இறக்குமதி வரிக் கொள்கைகள், ஈரானுடனான போர் மற்றும் ஜனாதிபதியின் அரசியல் நடவடிக்கைகள் தொடர்பான பொதுமக்களின் அதிருப்தி ஆகியவை தேர்தல் முடிவுகளில் தாக்கம் செலுத்தியுள்ளதாக அரசியல் ஆய்வாளர்கள் சுட்டிக்காட்டுகின்றனர்.
CNN வெளியிட்ட வாக்காளர் கருத்துக்கணிப்பின்படி, ஆறு பேரில் மூன்றுக்கும் மேற்பட்டோர் ட்ரம்பின் செயற்பாடுகள் குறித்து அதிருப்தி தெரிவித்துள்ளனர். மேலும், அவரது பொருளாதாரக் கொள்கைகள் நாட்டின் பொருளாதார நிலைமையை மோசமாக்கியுள்ளதாக மூன்றில் இரண்டு பங்கு வாக்காளர்கள் கருதியுள்ளனர்.
ஹக்கீம் ஜெஃப்ரிஸ் அமெரிக்க சபாநாயகராகலாம்
ஜனநாயகக் கட்சியின் தலைவர் ஹக்கீம் ஜெஃப்ரிஸ் (Hakeem Jeffries), பிரதிநிதிகள் சபையின் அடுத்த சபாநாயகராகப் பொறுப்பேற்கும் வாய்ப்பு ஏற்பட்டுள்ளது.
அவர் தெரிவு செய்யப்பட்டால், அமெரிக்க வரலாற்றில் பிரதிநிதிகள் சபையின் சபாநாயகர் பதவியை வகிக்கும் முதலாவது கறுப்பின ஆணாக அவர் சாதனை படைப்பார்.
ஜனநாயகக் கட்சியின் வெற்றியைத் தொடர்ந்து கருத்துத் தெரிவித்த அவர், அமெரிக்காவின் அரசியல் மாற்றத்திற்கான புதிய அத்தியாயம் ஆரம்பமாகியுள்ளதாகக் குறிப்பிட்டுள்ளார்.
மேலும், ஊழல் மற்றும் தீவிரவாத அரசியல் போக்குகளால் மக்கள் அதிருப்தியடைந்துள்ளதாகவும், ஜனநாயகக் கட்சி மக்களின் அன்றாடப் பிரச்சினைகளுக்கு முன்னுரிமை வழங்கும் அரசாங்கச் செயற்பாடுகளை முன்னெடுக்கும் என்றும் தெரிவித்துள்ளார்.
ட்ரம்ப் தேர்தல் முடிவுகளை ஏற்றுக்கொள்வதாக அறிவிப்பு
தேர்தல் தோல்வி குறித்துப் பதிலளித்த ஜனாதிபதி டொனால்ட் ட்ரம்ப், தேர்தல் முடிவுகளை ஏற்றுக்கொள்ளத் தயாராக இருப்பதாகத் தெரிவித்துள்ளார்.
நியூயோர்க் டைம்ஸ் ஊடகத்திடம் கருத்துத் தெரிவித்த அவர், தேர்தல் முடிவுகளை முழுமையாக ஏற்றுக்கொள்வதாகக் குறிப்பிட்டுள்ளார்.
இதற்கிடையில், ஜனநாயகக் கட்சி இரு அவைகளையும் கைப்பற்றியுள்ள நிலையில், தான் அரசியல் விமர்சகராக (Political Pundit) மாறப்போவதாக ட்ரம்ப் தனது Truth Social சமூக வலைத்தளத்தில் பதிவிட்டுள்ளார்.
ட்ரம்ப் நிர்வாகத்தின் எதிர்காலத்திற்கு என்ன தாக்கம்?
அமெரிக்க பாராளுமன்றத்தின் இரு அவைகளிலும் ஜனநாயகக் கட்சி பெரும்பான்மையைப் பெற்றுள்ளதால், ட்ரம்ப் நிர்வாகத்தின் எதிர்கால நடவடிக்கைகளில் பல்வேறு கட்டுப்பாடுகள் ஏற்படலாம் என எதிர்பார்க்கப்படுகிறது.
ஜனநாயகக் கட்சியினருக்கு அரசாங்கத்தின் நடவடிக்கைகள் தொடர்பில் விசாரணைகளை முன்னெடுக்கும் அதிகாரம் கிடைப்பதுடன், தேவையான ஆவணங்கள் மற்றும் சாட்சியங்களைப் பெறுவதற்கான சட்டபூர்வ அதிகாரங்களையும் பயன்படுத்த முடியும்.
மேலும், செனட் சபையின் கட்டுப்பாடு ஜனநாயகக் கட்சியிடம் செல்வதால், ட்ரம்ப் முன்மொழியும் நீதிபதிகள் நியமனங்கள் மற்றும் உயர் நீதிமன்ற நியமனங்கள் தொடர்பிலும் எதிர்ப்பை வெளிப்படுத்த முடியும்.
எனினும், ஜனாதிபதியின் வீட்டோ அதிகாரம் மற்றும் செனட் சபையில் பெரும்பாலான சட்டமூலங்களை நிறைவேற்றுவதற்குத் தேவையான 60 வாக்குகள் என்ற நடைமுறை காரணமாக, ஜனநாயகக் கட்சி தனது அனைத்து அரசியல் திட்டங்களையும் உடனடியாகச் செயல்படுத்துவது சவாலானதாக இருக்கும் என அரசியல் ஆய்வாளர்கள் தெரிவிக்கின்றனர்.
கடந்த 50 ஆண்டுகளில் இரண்டு முறை மட்டுமே ஒரே தேர்தல் சுழற்சியில் அமெரிக்க பாராளுமன்றத்தின் இரு அவைகளினதும் கட்டுப்பாடு ஒரே நேரத்தில் மாற்றமடைந்துள்ளதாக CNN சுட்டிக்காட்டியுள்ளது.
இதன்படி, 2026 இடைத்தேர்தல் முடிவுகள் டொனால்ட் ட்ரம்பின் ஆட்சிக்காலத்தின் எஞ்சிய இரண்டு ஆண்டுகளிலும் அமெரிக்க அரசியலில் முக்கியமான தாக்கத்தை ஏற்படுத்தும் என எதிர்பார்க்கப்படுகிறது.
