பிரிட்டனின் மான்செஸ்டர் நகரில் உள்ள யூத சமூகத்தை இலக்காகக் கொண்டு பயங்கரவாதத் தாக்குதல் நடத்த சதி செய்ததாகக் கூறப்படும் குற்றச்சாட்டில் இரண்டு ஈரானிய பிரஜைகள் மீது பயங்கரவாதக் குற்றச்சாட்டுகள் பதிவு செய்யப்பட்டுள்ளன.

சல்போர்டைச் சேர்ந்த 35 வயதான ரஹ்மான் சலேஹி மற்றும் லிவர்பூலைச் சேர்ந்த 36 வயதான சலாம் அஹ்மத்யான் ஆகிய இருவருமே குற்றச்சாட்டுக்கு உட்படுத்தப்பட்டுள்ளனர்.

கடந்த செப்டம்பர் 20ஆம் திகதி அல்லது அதற்கு முன்னர் பயங்கரவாதச் செயலை மேற்கொள்ளத் தயாராகியதாக அல்லது மற்றொருவருக்கு பயங்கரவாதச் செயலை மேற்கொள்ள உதவியதாக அவர்கள் மீது குற்றம் சுமத்தப்பட்டுள்ளது.

Yom Kippur எனப்படும் யூதர்களின் முக்கியமான மத தினத்துக்கு முந்தைய நாளில், மான்செஸ்டரின் Northern Quarter பகுதியில் இருவரும் கைது செய்யப்பட்டதாக BBC தெரிவித்துள்ளது.

குளோரின் குண்டு தயாரிப்பதற்கான முயற்சியா?

பயங்கரவாத எதிர்ப்புப் பொலிஸாரின் (Counter Terrorism Police) தகவலின்படி, சந்தேகநபர்கள் வெளிநாட்டில் உள்ள மூன்றாவது நபருடன் தொடர்பில் இருந்ததாகவும், அந்த நபர் ஈரானில் இருக்கக்கூடும் எனவும் விசாரணையாளர்கள் சந்தேகிக்கின்றனர்.

மேலும், குளோரின் அடிப்படையிலான வெடிகுண்டொன்றை தயாரிப்பதற்கான வழிமுறைகளைப் பெற்றதாகவும், அதற்குத் தேவையான திரவங்கள், உபகரணங்கள் மற்றும் பிற பொருட்களைப் பெற்றதாகவும் பொலிஸார் குற்றஞ்சாட்டியுள்ளனர்.

அத்துடன், சாத்தியமான தாக்குதல் இலக்குகளைப் பற்றி ஆய்வு செய்ததுடன், தாக்குதல் நடத்தக்கூடிய இடங்களை நேரில் சென்று கண்காணித்ததாகவும் விசாரணையாளர்கள் கூறியுள்ளனர்.

எவ்வாறாயினும், இவை அனைத்தும் தற்போது பொலிஸாரால் முன்வைக்கப்பட்டுள்ள குற்றச்சாட்டுகளாகும். வழக்கு நீதிமன்றத்தில் விசாரணைக்கு உட்படுத்தப்பட வேண்டியுள்ளது.

சிறிய படகு மூலம் பிரிட்டனுக்கு வந்தவர்கள்

சந்தேகநபர்கள் இருவரும் வெவ்வேறு ஆண்டுகளில் சிறிய படகுகள் மூலம் பிரிட்டனுக்கு வந்ததாக தெரிவிக்கப்பட்டுள்ளது.

அவர்களில் ஒருவர் புகலிடம் பெற்றுள்ளதாகவும், மற்றொருவரின் புகலிடக் கோரிக்கை இன்னும் பரிசீலனையில் இருப்பதாகவும் BBC தெரிவித்துள்ளது.

இந்த விவகாரம் தொடர்பாக லிவர்பூலில் Epworth Street மற்றும் சல்போர்டில் Lancaster Road ஆகிய இடங்களில் உள்ள முகவரிகளில் பொலிஸார் சோதனைகளை மேற்கொண்டுள்ளனர்.

யூத சமூகத்துக்கு பாதுகாப்பு அதிகரிப்பு

பிரிட்டன் உள்துறை அமைச்சர் Shabana Mahmood, இரண்டு ஈரானியர்கள் மீது குற்றச்சாட்டுகள் பதிவு செய்யப்பட்டுள்ள செய்தி மான்செஸ்டரில் உள்ள யூத சமூகத்தினருக்கு கவலையளிக்கும் விடயமாக இருக்கும் எனத் தெரிவித்துள்ளார்.

கடந்த ஆண்டு Heaton Park Synagogue மீது நடத்தப்பட்ட பயங்கரவாதத் தாக்குதலின் முதலாம் ஆண்டு நினைவு காலப்பகுதியிலும், யூதர்களின் முக்கிய மத நாட்களான Rosh Hashanah மற்றும் Yom Kippur காலப்பகுதியிலும் இந்த சம்பவம் இடம்பெற்றுள்ளதால் பாதுகாப்பு நடவடிக்கைகள் தொடர்ந்து முன்னெடுக்கப்படும் என Greater Manchester Police தெரிவித்துள்ளது.

Greater Manchester Police துணை தலைமை காவல் அதிகாரி Terry Woods, யூத சமூகங்கள் வசிக்கும் பகுதிகளில் பொலிஸாரின் கண்காணிப்பு மற்றும் பாதுகாப்பு நடவடிக்கைகள் தொடர்ந்து அதிகரிக்கப்பட்ட நிலையில் இருக்கும் எனக் கூறியுள்ளார்.

பொதுமக்கள் தொடர்ந்து பொலிஸாரின் கண்காணிப்பு இருப்பதை காணக்கூடும் என்றும், சமூகங்களுடன் தொடர்பு கொண்டு பாதுகாப்பை உறுதிப்படுத்தும் நடவடிக்கைகள் முன்னெடுக்கப்படும் என்றும் அவர் தெரிவித்துள்ளார்.

நீதிமன்றத்தில் ஆஜர்

குற்றச்சாட்டுக்கு உட்படுத்தப்பட்டுள்ள இருவரும் சனிக்கிழமை Westminster Magistrates’ Court முன்னிலையில் ஆஜர்படுத்தப்பட உள்ளதாக BBC தெரிவித்துள்ளது.

இந்த வழக்கு தொடர்பான விசாரணைகள் தொடர்ந்து முன்னெடுக்கப்பட்டு வரும் நிலையில், குற்றச்சாட்டுகளின் உண்மைத் தன்மை நீதிமன்ற நடவடிக்கைகளின் ஊடாகவே தீர்மானிக்கப்படும்.