நேற்று (07) நாட்டின் பல்வேறு பகுதிகளில் இடம்பெற்ற தனித்தனி சாலை விபத்துகளில் 11 வயது மாணவன் மற்றும் 82 வயது மூதாட்டி உட்பட ஆறு பேர் உயிரிழந்துள்ளதாக பொலிஸார் தெரிவித்துள்ளனர்.
நிகவரட்டிய பகுதியில், வைத்தியசாலைக்கு அருகில் வீதியைக் கடக்க முயன்ற 82 வயதுடைய பெண் ஒருவர் லொறி மோதியதில் உயிரிழந்தார். சம்பவத்துடன் தொடர்புடைய லொறி சாரதி கைது செய்யப்பட்டுள்ளார்.
பன்சியாகம பகுதியில், பாடசாலை வானில் இருந்து இறங்கி வீதியைக் கடக்க முயன்ற 11 வயதுடைய மாணவன் ஒருவர் லொறி மோதியதில் உயிரிழந்தார். சம்பவம் தொடர்பாக லொறி சாரதி பொலிஸாரால் கைது செய்யப்பட்டுள்ளார்.
ஹிக்கடுவை பகுதியில், கார் ஒன்று கட்டுப்பாட்டை இழந்து வீதியை விட்டு விலகி பாதசாரி ஒருவரை மோதியதுடன் கான்கிரீட் மின்கம்பத்திலும் மோதியுள்ளது. விபத்தில் காயமடைந்த 55 வயது சாரதி பின்னர் வைத்தியசாலையில் உயிரிழந்தார். பாதசாரி காயங்களுடன் சிகிச்சை பெற்று வருகிறார்.
மஹவ பகுதியில், மோட்டார் சைக்கிளின் கட்டுப்பாட்டை இழந்த 19 வயதுடைய இளைஞர் ஒருவர் கல்வாயில் மோதியதில் உயிரிழந்தார். பின்னால் பயணித்தவர் காயமடைந்துள்ளார்.
கிரிபாவ பகுதியில், மோட்டார் சைக்கிளும் எதிரே வந்த காரும் மோதிய விபத்தில் 18 வயதுடைய இளைஞர் ஒருவர் உயிரிழந்தார். மோட்டார் சைக்கிளில் பயணித்த மற்றைய நபர் வைத்தியசாலையில் அனுமதிக்கப்பட்டுள்ளார்.
இதேவேளை, எஹெலியகொட பகுதியில் அவிசாவளை – இரத்தினபுரி பிரதான வீதியைக் கடக்க முயன்ற 42 வயதுடைய நபர் ஒருவர் பேருந்து மோதியதில் உயிரிழந்தார். சம்பவம் தொடர்பாக பேருந்து சாரதி கைது செய்யப்பட்டுள்ளார்.
இந்த அனைத்து விபத்துகள் தொடர்பிலும் மேலதிக விசாரணைகளை பொலிஸார் மேற்கொண்டு வருகின்றனர்.
