ரஷ்ய தலைநகர் மாஸ்கோ மீது உக்ரைன் அண்மைய ஆண்டுகளில் மேற்கொண்ட மிகப்பெரிய ட்ரோன் தாக்குதல்களில் ஒன்றாகக் கருதப்படும் தாக்குதல் வியாழக்கிழமை (19) இடம்பெற்றது.
இந்த தாக்குதலில், மாஸ்கோவின் தென்கிழக்குப் பகுதியில் அமைந்துள்ள கபோட்னியா (Kapotnya) எண்ணெய் சுத்திகரிப்பு நிலையம் இந்த வாரத்தில் இரண்டாவது முறையாக தாக்கப்பட்டதாக தெரிவிக்கப்படுகிறது. இதன் காரணமாக அங்கு பாரிய தீப்பற்றலும் கரும்புகை மேகங்களும் எழுந்தன.
ரஷ்ய அதிகாரிகளின் தகவலின்படி, இரவு முழுவதும் மாஸ்கோவை நோக்கி வந்த 190 உக்ரைன் ட்ரோன்கள் சுட்டு வீழ்த்தப்பட்டன. எனினும் சில ட்ரோன்கள் பாதுகாப்பு வளையங்களை தாண்டி எண்ணெய் சுத்திகரிப்பு நிலையத்தைத் தாக்கியதாக கூறப்படுகிறது.
இந்த தாக்குதலால் மாஸ்கோவின் முக்கிய விமான நிலையங்களில் தற்காலிகமாக விமான சேவைகள் இடைநிறுத்தப்பட்டன.
உக்ரைன் ஜனாதிபதி Volodymyr Zelenskyy, ரஷ்யா உக்ரைனின் நகரங்கள் மற்றும் மதத்தலங்கள் மீது நடத்திய தாக்குதல்களுக்கு பதிலடியாக இந்த நடவடிக்கை மேற்கொள்ளப்பட்டதாக தெரிவித்தார்.
“உக்ரைன் எரிந்தால், மாஸ்கோவும் எரியும்,” என அவர் எச்சரிக்கை விடுத்ததாக சர்வதேச ஊடகங்கள் செய்தி வெளியிட்டுள்ளன.
மறுபுறம், மாஸ்கோ மேயர் Sergei Sobyanin, இது கடந்த இரண்டு ஆண்டுகளில் மாஸ்கோ பிராந்தியத்தின் மீது நடத்தப்பட்ட மிகப்பெரிய ட்ரோன் தாக்குதல் என தெரிவித்துள்ளார்.
இந்த தாக்குதல், உக்ரைன்–ரஷ்யா போரில் பதற்றத்தை மேலும் அதிகரித்துள்ளதுடன், சமாதான பேச்சுவார்த்தைகள் குறித்த எதிர்பார்ப்புகளுக்கும் புதிய சவால்களை ஏற்படுத்தியுள்ளது.
