பிரித்தானியாவுக்கு அனுப்பப்படவிருந்ததாகக் கூறப்படும் சுமார் 28 மில்லியன் அமெரிக்க டொலர் பெறுமதியான கொக்கெய்ன் கைப்பற்றப்பட்ட சம்பவத்தைத் தொடர்ந்து, சர்வதேச போதைப்பொருள் கடத்தல் வலையமைப்புடன் தொடர்புடையதாக சந்தேகிக்கப்படும் நைஜீரிய சமூக ஊடக பிரபலம் ஒருவர் கைது செய்யப்பட்டுள்ளார்.
49 வயதான Afolabi Kazeem Micheal, சமூக ஊடகங்களில் “KC Luxury” என்ற பெயரில் அறியப்படுபவர். Instagram-இல் சுமார் 700,000 பின்தொடர்பவர்களைக் கொண்ட இவர், தன்னை தங்கம் மற்றும் ஆடம்பரப் பொருட்கள் தொடர்பான தொழிலதிபராக அறிமுகப்படுத்தி வந்ததாக BBC தெரிவித்துள்ளது.
நைஜீரிய போதைப்பொருள் தடுப்பு அமைப்பான NDLEA-வின் தகவலின்படி, தென் அமெரிக்காவிலிருந்து நைஜீரியா ஊடாக ஐரோப்பா மற்றும் ஆசியாவுக்கு கொக்கெய்ன் கடத்தும் சர்வதேச வலையமைப்பின் நைஜீரிய நடவடிக்கைகளுக்கு Micheal முக்கிய நபராக செயல்பட்டதாக சந்தேகிக்கப்படுகிறது.
கடந்த ஆகஸ்ட் 3ஆம் திகதி, லாகோஸில் உள்ள ஒரு கூரியர் நிலையத்தில் பழுப்பு நிறப் பெட்டிகளில் மறைத்து வைக்கப்பட்டிருந்த 184.5 கிலோகிராம் கொக்கெய்ன் அதிகாரிகளால் கைப்பற்றப்பட்டது.
இந்த போதைப்பொருள் சர்வதேச கடத்தல் வலையமைப்பினால் பிரித்தானியாவுக்கு அனுப்பப்படவிருந்ததாக NDLEA தெரிவித்துள்ளது.
இதனைத் தொடர்ந்து, நாட்டை விட்டு வெளியேற முயற்சிப்பதாக கிடைத்த தகவலின் அடிப்படையில் Micheal 10 நாட்களுக்குப் பின்னர் லாகோஸில் உள்ள Murtala Mohammed சர்வதேச விமான நிலையத்தில் கைது செய்யப்பட்டார். அவர் Paris நோக்கி Business Class விமானத்தில் பயணிக்கத் தயாராக இருந்ததாக அதிகாரிகள் தெரிவித்துள்ளனர்.
கைது செய்யப்பட்டபோது அவரிடம் மூன்று நாணயங்களில் 12,840 அமெரிக்க டொலருக்கும் அதிகமான பணம் மற்றும் விலையுயர்ந்த நகைகள் இருந்ததாக NDLEA கூறியுள்ளது.
இந்தப் பொருட்கள் சட்டவிரோத வர்த்தகத்தின் மூலம் கிடைத்த வருமானத்துடன் தொடர்புடையவை என அதிகாரிகள் சந்தேகிக்கின்றனர்.
இந்த வழக்கில் 33 வயதான Lawal Mujab Kehinde என்பவரும் கைது செய்யப்பட்டுள்ளார். கொக்கெய்ன் கடத்தப்பட்டதாகக் கூறப்படும் Logistics நிறுவனத்தில் பணியாற்றிய இவர், போதைப்பொருளை ஏற்றுமதிக்காக தயாரித்து, அதற்காக பணம் பெற்றதாக NDLEA குற்றஞ்சாட்டியுள்ளது.
இந்தக் குற்றச்சாட்டுகள் தொடர்பாக Micheal மற்றும் Kehinde இருவரும் இதுவரை கருத்து தெரிவிக்கவில்லை; மேலும் அவர்கள் நீதிமன்றத்தில் குற்றஞ்சாட்டப்பட்டதாகவும் தெரிவிக்கப்படவில்லை.
இந்த சர்வதேச வலையமைப்புடன் தொடர்புடையதாக சந்தேகிக்கப்படும் மேலும் சிலர் பிரித்தானியாவிலும் கைது செய்யப்பட்டுள்ளதாக NDLEA தெரிவித்துள்ளது.
NDLEA தலைவர் General Buba Marwa, சர்வதேச சட்ட அமுலாக்க நிறுவனங்களின் ஒத்துழைப்புடன் மேற்கொள்ளப்படும் நடவடிக்கைகள் மூலம் போதைப்பொருள் கடத்தல் வலையமைப்பின் மேலும் பல உறுப்பினர்களை கைது செய்வதற்கு நடவடிக்கை எடுக்கப்படும் என தெரிவித்துள்ளார்.
(BBC)
