அமெரிக்காவின் டென்னசி மாகாணத்தில் மரண தண்டனை விதிக்கப்பட்டுள்ள கிறிஸ்டா பைக்கின் தண்டனை, திட்டமிட்டபடி நிறைவேற்றப்பட்டால், செப்டம்பர் 30ஆம் திகதி விஷ ஊசி மூலம் நிறைவேற்றப்படவுள்ளது.

தற்போது 50 வயதாகும் கிறிஸ்டா பைக், 1995ஆம் ஆண்டு தனது அப்போதைய காதலருடன் இணைந்து 19 வயதான கொலீன் ஸ்லெம்மரை கொலை செய்த குற்றத்திற்காக மரண தண்டனை விதிக்கப்பட்டவர்.

கொலைச் சம்பவம் தொடர்பான வழக்கில், கொலீன் ஸ்லெம்மர் கொடூரமாகத் தாக்கப்பட்டு சித்ரவதை செய்யப்பட்ட பின்னர் கொலை செய்யப்பட்டதாக நீதிமன்றத்தில் தெரிவிக்கப்பட்டிருந்தது.

பைக்கின் வழக்கறிஞர்கள், அவரது குழந்தைப் பருவத்தில் இடம்பெற்றதாக ஆவணப்படுத்தப்பட்ட பாலியல் துஷ்பிரயோகம், புறக்கணிப்பு உள்ளிட்ட பின்னணியையும், பின்னர் கண்டறியப்பட்ட மனநலப் பிரச்சினைகளையும் கருத்தில் கொண்டு மரண தண்டனையை மாற்றுமாறு கோரி 226 பக்கங்கள் கொண்ட கருணை மனுவை தாக்கல் செய்துள்ளனர்.

மேலும், ஐக்கிய நாடுகள் சபையின் மனித உரிமை நிபுணர்களும் அவரது மரண தண்டனையை நிறுத்துமாறு கோரிக்கை விடுத்துள்ளனர்.

எனினும், பைக்கின் மேல்முறையீடுகள் இதுவரை வெற்றியளிக்கவில்லை. கடந்த ஆண்டு டென்னசி நீதிமன்றமும் அவரது தண்டனையை மாற்றுவதற்கான போதுமான சூழ்நிலைகளை அவர் நிரூபிக்கவில்லை எனத் தீர்ப்பளித்திருந்தது.

கடைசி வேண்டுகோள்

மரண தண்டனை நிறைவேற்றப்படும் நாளில், தன்னைச் சுற்றியுள்ளவர்கள் அனைவரும் பெண்களாக இருக்க வேண்டும் என பைக் கோரியுள்ளார்.

குறிப்பாக, ஆண் காவலர்களால் தன்னைப் பிடித்து கட்டுப்படுத்துவது தனது மன உளைச்சலை அதிகரிக்கக்கூடும் என அவர் தெரிவித்துள்ளதாக கூறப்படுகிறது.

மேலும், தனது மரண தண்டனை நிறைவேற்றப்படுவதை அன்புக்குரியவர்கள் நேரில் பார்க்க வேண்டாம் என்றும் அவர் விரும்பியுள்ளார்.

டென்னசி அதிகாரிகள், அவரை மரண தண்டனை நிறைவேற்றப்படும் சிறைக்கு அழைத்துச் செல்லும் பணியில் பெண் காவலர்களை பயன்படுத்துவது குறித்து நடவடிக்கை எடுக்கப்படுவதாக தெரிவித்துள்ளனர். எனினும், முழுமையான ஏற்பாடு உறுதி செய்யப்படவில்லை.

பாதிக்கப்பட்டவரின் குடும்பத்தின் நிலைப்பாடு

கொலீன் ஸ்லெம்மரின் தாயார் மே மார்ட்டினெஸ், தனது மகளின் கொலைக்கு பைக் தண்டனை அனுபவிக்க வேண்டும் என தொடர்ந்து வலியுறுத்தி வருகிறார்.

மறுபுறம், பைக்கின் தோழியான ஆஷ்லீ செல்லர்ஸ், கிறிஸ்டா பைக்கின் கடந்தகால துஷ்பிரயோகங்கள் மற்றும் மன உளைச்சல்களையும் கருத்தில் கொள்ள வேண்டும் எனக் கருதுகிறார்.

கிறிஸ்டா பைக்கின் மரண தண்டனையை நிறைவேற்றுவது தொடர்பான இறுதி முடிவு மற்றும் அடுத்தகட்ட சட்ட நடவடிக்கைகள் குறித்து அவரது வழக்கறிஞர்கள் தொடர்ந்து முயற்சித்து வருகின்றனர்.

தண்டனை நிறைவேற்றப்படுமா அல்லது இறுதி நேரத்தில் அது மாற்றப்படுமா என்பது செப்டம்பர் 30ஆம் திகதி வரை தீர்மானிக்கப்படாமல் இருக்கலாம் என தெரிவிக்கப்பட்டுள்ளது.