🇺🇸🇨🇳 அமெரிக்கா சீனாவுக்கு ஆயுதங்களை விற்பனை செய்யாததன் பின்னணி என்ன?
சீனாவுக்கு அமெரிக்கா ஆயுதங்களை விற்பனை செய்வது தொடர்பாக அமெரிக்கத் தூதர் டேவிட் பெர்ட்யூ தெரிவித்த கருத்துகள் சர்ச்சையை ஏற்படுத்தியுள்ள நிலையில், சீனாவுக்கு அமெரிக்க ஆயுதங்களை விற்பனை செய்வதில் நீண்டகால சட்டத் தடைகள் உள்ளதாக தகவல்கள் தெரிவிக்கின்றன.
சீனாவுக்கான அமெரிக்கத் தூதர் டேவிட் பெர்ட்யூ, சமீபத்தில் சீன அதிபர் ஷி ஜின்பிங்குடன் இடம்பெற்ற பேச்சுவார்த்தையின்போது, சீனாவுக்கு சில அமெரிக்க ஆயுதங்களை வாங்குவதில் விருப்பம் உள்ளதா என அமெரிக்க ஜனாதிபதி டொனால்ட் ட்ரம்ப் கேட்டதாகத் தெரிவித்திருந்தார்.
எனினும், பெர்ட்யூவின் கருத்துக்குப் பின்னர், சீனாவுக்கு ஆயுதங்களை விற்பனை செய்ய அமெரிக்காவுக்கு எந்தத் திட்டமும் இல்லை என வெள்ளை மாளிகையும் அமெரிக்க வெளியுறவுத்துறையும் தெரிவித்துள்ளன.
🇨🇳 சீனாவுக்கு ஆயுத விற்பனைக்கு நீண்டகாலத் தடை
1989ஆம் ஆண்டு சீனாவின் தியனன்மென் சதுக்கத்தில் இடம்பெற்ற ஜனநாயக ஆதரவு போராட்டங்களின்போது சீன அரசின் நடவடிக்கைகளைத் தொடர்ந்து, அப்போதைய அமெரிக்க ஜனாதிபதி ஜோர்ஜ் எச்.டபிள்யூ. புஷ், சீனாவுக்கு ஆயுதங்கள் மற்றும் இராணுவ உபகரணங்களை ஏற்றுமதி செய்வதற்கு தடைகளை விதித்தார்.
பின்னர், அமெரிக்க காங்கிரஸ் இந்தக் கட்டுப்பாடுகளை சட்டரீதியாக மேலும் விரிவுபடுத்தியது.
இதன்படி, அமெரிக்க ஆயுதத் தளவாடப் பட்டியலில் இடம்பெறும் பாதுகாப்பு சார்ந்த பொருட்கள் மற்றும் பாதுகாப்புச் சேவைகளை சீனாவுக்கு ஏற்றுமதி செய்வதற்கான உரிமங்களை வழங்குவதில் கட்டுப்பாடுகள் உள்ளன.
🇹🇼 தைவான் விவகாரம்
அமெரிக்கா–சீனா இடையிலான ஆயுத விவகாரத்தில் தைவான் முக்கிய காரணியாக உள்ளது.
சீனா தைவானை தனது நாட்டின் ஒரு பகுதியாகக் கருதுகிறது. அதேவேளை, அமெரிக்கா நீண்டகாலமாக தைவானுக்கு தற்காப்பு நோக்கிலான ஆயுதங்களை வழங்கி வருகிறது.
இதனால், தைவானுக்கு அமெரிக்கா ஆயுதங்களை வழங்குவது குறித்து சீனா தொடர்ந்து எதிர்ப்புத் தெரிவித்து வருகிறது.
அமெரிக்கா சமீபத்தில் தைவானுக்கான மேலும் சுமார் 14 பில்லியன் அமெரிக்க டொலர் மதிப்பிலான ஆயுத ஒப்பந்தம் தொடர்பான முடிவை தாமதப்படுத்தியுள்ளதாகவும் தகவல்கள் வெளியாகியுள்ளன. இதற்கு முன்னதாக தைவானுக்கு 11.1 பில்லியன் டொலர் மதிப்பிலான ஆயுத விற்பனைக்கு அமெரிக்கா ஒப்புதல் அளித்திருந்ததாக AFP தகவலை மேற்கோள்காட்டி BBC தெரிவித்துள்ளது.
🌍 உலகின் மிகப்பெரிய ஆயுத ஏற்றுமதியாளர்
ஸ்டாக்ஹோம் சர்வதேச அமைதி ஆராய்ச்சி நிறுவனமான SIPRI தரவுகளின்படி, 2020 முதல் 2024ஆம் ஆண்டு வரையிலான காலகட்டத்தில் உலகளாவிய முக்கிய ஆயுத ஏற்றுமதிகளில் அமெரிக்காவின் பங்கு 43% ஆக இருந்தது.
இதன் மூலம் அமெரிக்கா உலகின் மிகப்பெரிய ஆயுத ஏற்றுமதியாளராகத் தொடர்கிறது. இதே காலகட்டத்தில் பிரான்ஸ் இரண்டாவது பெரிய ஏற்றுமதியாளராக இருந்தது.
ரஷ்யா–உக்ரைன் போர் தொடங்கிய பின்னர், ஐரோப்பிய நாடுகளின் அமெரிக்க ஆயுத இறக்குமதியும் அதிகரித்துள்ளதாக SIPRI தரவுகள் தெரிவிக்கின்றன.
