இங்கிலாந்தின் மெர்சிசைட் பகுதியில் வீடொன்றில் ஏற்பட்ட தீ விபத்துக்கு லித்தியம்-அயன் பேட்டரியுடன் தொடர்புடைய மின்சார கோளாறு காரணமாக இருந்ததாக விசாரணைகளில் தெரியவந்துள்ளது.
Bootle, Stone Square பகுதியில் கடந்த செப்டம்பர் 22ஆம் திகதி அதிகாலை ஏற்பட்ட தீ விபத்தில் 36 வயதான Elisha Brabin மற்றும் அவரது மூன்று குழந்தைகளான Leo (16), Ellis (8), Prudence (7) ஆகியோர் உயிரிழந்தனர்.
தீ வேகமாக வீடு முழுவதும் பரவியதாக தெரிவிக்கப்பட்டுள்ளது. சம்பவ இடத்திற்கு ஆறு தீயணைப்பு வாகனங்கள் அனுப்பப்பட்டிருந்தன.
வீட்டின் மாடியிலுள்ள அறையொன்றில் உயிரிழந்த நிலையில் நான்கு பேரும் கண்டுபிடிக்கப்பட்டதாக Merseyside Fire and Rescue Service தெரிவித்துள்ளது. மேலும், தீக்காயங்களுக்குள்ளான ஒருவர் மருத்துவமனையில் அனுமதிக்கப்பட்டார்.
⚠️ லித்தியம்-அயன் பேட்டரிகள் குறித்து எச்சரிக்கை
இந்த பேட்டரி எதற்காக பயன்படுத்தப்பட்டது என்பதை தீயணைப்பு சேவை இதுவரை உறுதிப்படுத்தவில்லை. இருப்பினும், இவை பொதுவாக மின்சார சைக்கிள்கள் (e-bikes) மற்றும் மின்சார ஸ்கூட்டர்களில் (e-scooters) பயன்படுத்தப்படுகின்றன.
Merseyside பகுதியில் மட்டும் 2023 ஏப்ரல் முதல் 2026 ஆகஸ்ட் வரை லித்தியம்-அயன் பேட்டரிகளுடன் தொடர்புடைய 150 தீ விபத்துகள் பதிவாகியுள்ளதாக அதிகாரிகள் தெரிவித்துள்ளனர். அவற்றில் 5 உயிரிழப்புகளும் இடம்பெற்றுள்ளன.
தீயணைப்பு அதிகாரிகள், உற்பத்தியாளர் பரிந்துரைக்கும் பேட்டரி மற்றும் சார்ஜர்களை மட்டுமே பயன்படுத்துமாறு பொதுமக்களை வலியுறுத்தியுள்ளனர்.
மேலும், பேட்டரி வீங்குதல், வழக்கத்திற்கு மாறான சத்தம் எழுப்புதல், கடுமையான வாசனை, சார்ஜ் ஆகாமல் இருப்பது அல்லது புகை வெளியேறுதல் போன்ற அறிகுறிகள் தென்பட்டால் உடனடியாக அதைப் பயன்படுத்துவதை நிறுத்துமாறும் அறிவுறுத்தப்பட்டுள்ளது.
உயிரிழந்த Elisha Brabin மற்றும் அவரது குழந்தைகளுக்கு குடும்பத்தினர் அஞ்சலி செலுத்தியுள்ளதுடன், அவர்கள் இழப்பு ஒருபோதும் ஈடுசெய்ய முடியாதது என தெரிவித்துள்ளனர்.
