சயோனிசம் இனவாதத்தின் ஒரு வடிவம் எனக் குறிப்பிடும் தீர்மானத்தை இங்கிலாந்து மற்றும் வேல்ஸ் கிரீன் கட்சி நிறைவேற்றியதைத் தொடர்ந்து, அக்கட்சியின் தலைவர் ஸாக் போலன்ஸ்கி (Zack Polanski) இஸ்ரேலுக்குள் நுழைவதற்கு தடை விதிக்கப்பட்டுள்ளதாக இஸ்ரேலின் வெளிவிவகார அமைச்சு தெரிவித்துள்ளது.

பிரைட்டனில் நடைபெற்ற கிரீன் கட்சியின் மாநாட்டில் முன்வைக்கப்பட்ட இந்தத் தீர்மானம், 1,022 வாக்குகளுக்கு எதிராக 813 வாக்குகளால் உறுப்பினர்களால் அங்கீகரிக்கப்பட்டது.

இந்தத் தீர்மானம் சயோனிசத்தை, “வரலாற்று பாலஸ்தீனப் பிரதேசம் முழுவதிலும் யூத இன அடிப்படையிலான அரசை ஆதரிக்கும் கொள்கை” என வரையறுத்துள்ளதுடன், வரலாற்று பாலஸ்தீனப் பிரதேசம் முழுவதையும் உள்ளடக்கிய “ஒற்றை ஜனநாயக பாலஸ்தீன அரசை” ஆதரிப்பதாகவும் குறிப்பிடுகிறது.

எவ்வாறாயினும், இஸ்ரேலின் வெளிவிவகார அமைச்சு இந்தத் தீர்மானத்தை கடுமையாக விமர்சித்துள்ளது. இது “தெளிவான யூத எதிர்ப்பு உள்ளடக்கத்தைக் கொண்டது” என்றும், சட்டபூர்வமான அரசியல் விவாதத்தின் எல்லைகளை மீறுவதாகவும் அந்த அமைச்சு தெரிவித்துள்ளது.

அதேவேளை, பிரிட்டிஷ் யூதர்களின் பிரதிநிதிகள் குழுவும் (Board of Deputies of British Jews), Jewish Leadership Council அமைப்பும் தீர்மானத்திற்கு எதிர்ப்பு தெரிவித்துள்ளன.

அவர்கள் வெளியிட்ட அறிக்கையில், சயோனிசத்தை இனவாதம் எனக் குறிப்பிடுவது பிரிட்டனில் உள்ள பெரும்பாலான யூதர்களையும் யூத அமைப்புகளையும் இனவாதிகளாக சித்தரிப்பதாக அமையலாம் எனவும், இது யூதர்களுக்கு எதிரான வெறுப்பை அதிகரிக்கக்கூடும் எனவும் தெரிவித்துள்ளனர்.

தீர்மானத்தில் கருத்து வேறுபாடுகள்

இந்த விவகாரம் கிரீன் கட்சிக்குள்ளும் கருத்து வேறுபாடுகளை ஏற்படுத்தியுள்ளது.

கட்சியின் ஐந்து நாடாளுமன்ற உறுப்பினர்களில் நான்கு பேர் தீர்மானத்திற்கு எதிராக பகிரங்கமாக கருத்து தெரிவித்துள்ளனர். முன்னாள் கிரீன் கட்சித் தலைவர் கரோலின் லூகாஸ் உள்ளிட்ட சிலர் மாநாட்டில் தீர்மானத்திற்கு எதிராக உரையாற்றியுள்ளனர்.

கட்சியின் துணைத் தலைவர் Mothin Ali, தீர்மானத்திற்கு ஆதரவாக கருத்து தெரிவித்திருந்த நிலையில், அது யூதர்களை அல்லது தங்களை சயோனிஸ்ட்கள் என அடையாளப்படுத்திக் கொள்பவர்களை இனவாதிகள் எனக் குறிப்பிடுவதல்ல எனத் தெரிவித்துள்ளார்.

மறுபுறம், துணைத் தலைவர் Rachel Millward தீர்மானத்தில் பயன்படுத்தப்பட்டுள்ள வார்த்தைகள் “பிரச்சினைக்குரியவை” எனக் குறிப்பிட்டுள்ளார்.

கிரீன் கட்சித் தலைவர் ஸாக் போலன்ஸ்கி வாக்கெடுப்பில் பங்கேற்கவில்லை. மாநாட்டை முன்கூட்டியே விட்டு வெளியேறி Holborn மற்றும் St Pancras இடைத்தேர்தல் பிரசாரத்தில் ஈடுபட்டிருந்ததாக BBC தெரிவித்துள்ளது.

எனினும், வாக்கெடுப்புக்கு முன்னதாக அவர், பாலஸ்தீன மக்களை இடம்பெயரச் செய்வதை சயோனிசம் குறிக்கும் என்றால், அது இனவாதமானது எனத் தெரிவித்திருந்தார்.

அதேவேளை, “ஒற்றை பாலஸ்தீன அரசை” ஆதரிக்கும் பகுதியை மாற்ற வேண்டும் என்றும் அவர் விரும்பியிருந்தார். இஸ்ரேல்–பாலஸ்தீன பிரச்சினைக்கான எதிர்கால அரசியல் தீர்வு தொடர்பில் ஒரு குறிப்பிட்ட மாதிரியை கிரீன் கட்சியோ அல்லது பிரிட்டிஷ் அரசாங்கமோ தீர்மானிக்கக் கூடாது என அவர் கூறியிருந்தார்.

அவர் முன்வைத்த மாற்றங்கள் கட்சி உறுப்பினர்களால் நிராகரிக்கப்பட்டன.

அரசியல் கட்சிகளிடையே விமர்சனம்

கிரீன் கட்சியின் தீர்மானம் பிரிட்டனின் பிரதான அரசியல் கட்சிகளிடையேயும் விமர்சனங்களை ஏற்படுத்தியுள்ளது.

Labour கட்சியின் தலைவர் Bridget Phillipson, இந்தத் தீர்மானம் “ஒரு எல்லையைத் தாண்டியுள்ளது” எனக் கூறியதுடன், கிரீன் கட்சியின் எதிர்கால நிலைப்பாட்டை போலன்ஸ்கி தெளிவுபடுத்த வேண்டும் எனத் தெரிவித்துள்ளார்.

Conservative கட்சியின் Shadow Home Secretary Chris Philp, தீர்மானத்தை விமர்சித்து, பிரிட்டிஷ் யூதர்கள் தங்களை ஏற்றுக்கொள்ளச் செய்வதற்காக யூதர்களின் சுயநிர்ணய உரிமை அல்லது இஸ்ரேல் நாட்டின் இருப்பை ஆதரிப்பதை மறுக்க வேண்டிய நிலை ஏற்படக்கூடாது எனத் தெரிவித்துள்ளார்.

Liberal Democrat நாடாளுமன்ற உறுப்பினர் Luke Taylor, தீர்மானம் பிரிட்டனில் அதிகரித்து வரும் இஸ்லாமோபோபியா மற்றும் யூத எதிர்ப்புவாதம் தொடர்பான பதற்றங்களை மேலும் அதிகரிக்கக்கூடும் எனக் கூறியுள்ளார்.

இதனிடையே, கிரீன் கட்சியின் ஐந்து நாடாளுமன்ற உறுப்பினர்கள் மற்றும் துணைத் தலைவர்கள் இணைந்து வெளியிட்ட அறிக்கையில், கட்சி அனைத்து வகையான இனவாதத்திற்கும் எதிரானதாக இருக்கும் என்றும், பாலஸ்தீன மக்களின் உரிமைகளை ஆதரிப்பதற்கும் யூத மக்களின் உரிமைகளை ஆதரிப்பதற்கும் இடையில் முரண்பாடு இல்லை என்றும் தெரிவித்துள்ளனர்.

இந்தத் தீர்மானம் கட்சியின் அதிகாரப்பூர்வ கொள்கையாக மாறினாலும், அடுத்த பொதுத் தேர்தலுக்கான கட்சியின் தேர்தல் அறிக்கையில் அது கட்டாயமாக இடம்பெறும் என அர்த்தமல்ல என கிரீன் கட்சி விதிகள் தெரிவிக்கின்றது.