இலங்கையில் புதிய வங்கிக் கணக்குகளைத் திறப்பதற்கும், வாகன வருமான அனுமதிப்பத்திரங்களைப் (Vehicle Revenue Licence) புதுப்பிப்பதற்கும் வரி செலுத்துவோர் அடையாள எண் (TIN) சான்றிதழ் கட்டாயமில்லை என நிதி அமைச்சு தெளிவுபடுத்தியுள்ளது.

இந்தச் சேவைகளைப் பெற்றுக்கொள்வதில் பொதுமக்களுக்கு ஏற்படும் தாமதங்களைத் தவிர்க்கும் நோக்கில், உள்நாட்டு இறைவரித் திணைக்களம் மற்றும் மோட்டார் போக்குவரத்துத் திணைக்களத்துடன் இணைந்து விசேட ஏற்பாடுகள் செய்யப்பட்டுள்ளதாக நிதி அமைச்சு அறிவித்துள்ளது.

TIN எண் ஏற்கனவே உள்ளவர்களுக்கு

ஏற்கனவே TIN எண் பெற்றுள்ள போதிலும், அதற்கான சான்றிதழை வைத்திருக்காதவர்கள் தங்களது TIN எண்ணை சம்பந்தப்பட்ட நிறுவனத்திடம் சமர்ப்பித்தால் போதுமானது என அறிவிக்கப்பட்டுள்ளது.

TIN எண் இல்லாதவர்களுக்கும் வாய்ப்பு

இதுவரை TIN எண் பெற்றுக்கொள்ளாதவர்களும் புதிய வங்கிக் கணக்குகளைத் திறக்கவும், வாகன வருமான அனுமதிப்பத்திரங்களைப் புதுப்பிக்கவும் முடியும்.

இதற்காக விண்ணப்பதாரர்கள் தங்களது,

தேசிய அடையாள அட்டை இலக்கம் (NIC)

முழுப் பெயர்

முகவரி

தொலைபேசி இலக்கம்

மின்னஞ்சல் முகவரி

ஆகிய விபரங்களைச் சமர்ப்பிக்க வேண்டும்.

இந்த விபரங்களின் அடிப்படையில், சம்பந்தப்பட்ட நிறுவனங்கள் TIN எண்ணை வழங்குவதற்கோ அல்லது அதற்கான பதிவுகளை மேற்கொள்வதற்கோ ஏற்பாடுகளைச் செய்யும் என அறிவிக்கப்பட்டுள்ளது.

TIN சான்றிதழைச் சமர்ப்பிக்க முடியாத காரணத்தினால் மாத்திரம் பொதுமக்களுக்கு இந்தச் சேவைகளை வழங்குவதைத் தாமதப்படுத்தவோ அல்லது மறுக்கவோ கூடாது என நிதி அமைச்சு வலியுறுத்தியுள்ளது.

நவம்பர் 1 முதல் TIN சான்றிதழ் அவசியமான எட்டு பரிவர்த்தனைகள்

நவம்பர் 1ஆம் திகதி முதல் குறிப்பிட்ட எட்டு வகையான பரிவர்த்தனைகளுக்கு TIN சான்றிதழ் சமர்ப்பிப்பது கட்டாயமாக்கப்பட்டுள்ளது.

அவை வருமாறு:

1. புதிய வங்கி அல்லது நிதி நிறுவனக் கணக்கைத் திறத்தல்.
2. மோட்டார் வாகன வருமான அனுமதிப்பத்திரத்தைப் புதுப்பித்தல்.
3. கடன் அட்டையைப் (Credit Card) பெற்றுக்கொள்ளுதல்.
4. கட்டிடத் திட்டத்திற்கான அனுமதியைப் பெற்றுக்கொள்ளுதல்.
5. மோட்டார் வாகனத்தைப் பதிவு செய்தல்.
6. காணி அல்லது காணி உரிமையைப் பதிவு செய்தல்.
7. வணிக நிறுவனத்தைப் பதிவு செய்தல்.
8. நிறுவனமொன்றின் பங்குகளைப் பரிமாற்றம் செய்தல்.

எனினும், புதிய வங்கிக் கணக்குகளைத் திறத்தல் மற்றும் வாகன வருமான அனுமதிப்பத்திரங்களைப் புதுப்பித்தல் ஆகிய இரண்டு சேவைகளுக்கும் மேலே குறிப்பிடப்பட்ட விசேட ஏற்பாடுகள் பொருந்தும் என அமைச்சு தெளிவுபடுத்தியுள்ளது. ஏனைய ஆறு பரிவர்த்தனைகளுக்கும் TIN சான்றிதழ் சமர்ப்பிக்கப்பட வேண்டும்.

அச்சிடப்பட்ட மற்றும் மின்னணு சான்றிதழ்கள் செல்லுபடியாகும்

TIN சான்றிதழின் அச்சிடப்பட்ட பிரதிகளும் (Printed Copy), மின்னணு பிரதிகளும் (Electronic Copy) செல்லுபடியாகும் எனவும் நிதி அமைச்சு அறிவித்துள்ளது.

இந்தச் சான்றிதழ்கள் கணினி முறைமையின் மூலம் உருவாக்கப்படுவதால், அவற்றில் உத்தியோகபூர்வ கையொப்பம், முத்திரை, பொறிக்கப்பட்ட முத்திரை அல்லது உண்மைப் பிரதி எனச் சான்றளிக்கும் தேவை இல்லை எனவும் தெரிவிக்கப்பட்டுள்ளது.

TIN பெற்றால் வருமான வரி செலுத்த வேண்டுமா?

இலங்கையில் வசிக்கும் 18 வயதுக்கு மேற்பட்ட அனைத்து தனிநபர்களும் TIN எண்ணைப் பெற்றுக்கொள்வது சட்டரீதியாக அவசியமாகும்.

எனினும், TIN எண் வைத்திருப்பதால் மாத்திரம் ஒருவர் வருமான வரி செலுத்த வேண்டிய கட்டாயம் ஏற்படாது என நிதி அமைச்சு சுட்டிக்காட்டியுள்ளது.

ஒருவரின் வருடாந்த வருமானம் 18 இலட்சம் ரூபாவை (ரூ. 1.8 மில்லியன்) மீறினால் மட்டுமே, நடைமுறையிலுள்ள வருமான வரி விதிகளுக்கு அமைவாக வருமான வரிப் பொறுப்பு ஏற்படும் என அறிவிக்கப்பட்டுள்ளது.

உடனடியாக TIN எண் தேவைப்படாதவர்கள், உள்நாட்டு இறைவரித் திணைக்களத்திலும் அதன் இணையவழி முறைமையிலும் காணப்படும் நெரிசல் குறையும் வரை பதிவுகளை ஒத்திவைக்குமாறும் அறிவுறுத்தப்பட்டுள்ளனர்.