காஸா பகுதியில் நிலவும் மோசமான மனிதாபிமான நிலைமையைக் கருத்தில் கொண்டு, அங்கு உடனடியாகவும் விரைவாகவும் தடையின்றியும் மனிதாபிமான உதவிகளை அனுமதிக்குமாறு இஸ்ரேலிடம் பிரித்தானியா, அவுஸ்திரேலியா, கனடா மற்றும் இத்தாலி ஆகிய நாடுகள் கூட்டாக வலியுறுத்தியுள்ளன.
காஸாவில் அண்மையில் ஏற்பட்ட கடும் மழை மற்றும் வெள்ளப்பெருக்கு காரணமாக இடம்பெயர்ந்த மக்களின் துயரங்கள் மேலும் அதிகரித்துள்ள நிலையில், நான்கு நாடுகளின் வெளிவிவகார அமைச்சர்களும் இணைந்து வெளியிட்டுள்ள அறிக்கையில் இந்தக் கோரிக்கை முன்வைக்கப்பட்டுள்ளது.
காஸாவில் அண்மையில் வீசிய கடும் புயல் காரணமாக ஆயிரக்கணக்கான மக்களின் தற்காலிகக் கூடாரங்கள் சேதமடைந்ததுடன், பல பகுதிகளில் வெள்ளப்பெருக்கும் ஏற்பட்டுள்ளது. போரினால் பாதிக்கப்பட்ட மக்களுக்கு குளிர்காலத்தை எதிர்கொள்வதும் பெரும் சவாலாக மாறியுள்ளது.
மனிதாபிமான உதவிகளுக்காகத் தேவைப்படும் சுமார் 1 இலட்சத்து 50 ஆயிரம் கூடாரங்கள் மற்றும் அத்தியாவசியப் பொருட்கள் எல்லைப் பகுதிகளில் தடுத்து வைக்கப்பட்டுள்ளதாக நான்கு நாடுகளின் கூட்டறிக்கையில் குறிப்பிடப்பட்டுள்ளது.
“இந்த நிலைமையை முற்றிலும் மாற்றியமைக்க முடியும். குளிர்காலம் முழுமையாக ஆரம்பமாவதற்கு முன்னர் நடவடிக்கை எடுப்பதற்கு இன்னும் கால அவகாசம் உள்ளது. எல்லைக் கடப்புகள் திறக்கப்பட வேண்டும். கூடாரங்கள் உள்ளே அனுமதிக்கப்பட வேண்டும்” என அந்த அறிக்கையில் வலியுறுத்தப்பட்டுள்ளது.
மேலும், மனிதாபிமான நடவடிக்கைகள் மற்றும் ஆரம்பகட்ட மீட்புப் பணிகளுக்குத் தேவையான இரட்டை பயன்பாட்டுப் பொருட்களையும் (Dual-use items) தாமதமின்றி அனுமதிக்க வேண்டும் எனக் கோரப்பட்டுள்ளது.
இஸ்ரேலின் விளக்கம்
காஸா எல்லைக் கடப்புகளைக் கட்டுப்படுத்தும் இஸ்ரேலிய இராணுவ அதிகார சபை, குளிர்காலத்திற்கான திட்டம் தொடர்பாக அமெரிக்கா தலைமையிலான அமைதி சபை மற்றும் ஐக்கிய நாடுகள் சபையுடன் ஒருங்கிணைந்து செயற்பட்டு வருவதாகத் தெரிவித்துள்ளது.
இதுவரை 93 ஆயிரம் கூடாரங்களும், குளிர்காலத் தேவைகளுக்கான பொருட்களைக் கொண்ட 8,600 நிவாரண உதவி லொறிகளும் காஸாவுக்குள் அனுமதிக்கப்பட்டுள்ளதாகவும் அந்த அதிகார சபை குறிப்பிட்டுள்ளது.
எனினும், ஹமாஸ் அமைப்பு முழுமையாக ஆயுதங்களைக் கைவிட்ட பின்னரே காஸாவின் மீள்கட்டுமானப் பணிகளை ஆரம்பிக்க முடியும் என்றும் இஸ்ரேலிய அதிகாரிகள் தெரிவித்துள்ளனர்.
வெள்ளப்பெருக்கினால் உயிரிழப்புகளும் சேதங்களும்
ஐக்கிய நாடுகள் சபையின் மனிதாபிமான விவகாரங்களுக்கான ஒருங்கிணைப்பு அலுவலகம் (OCHA) வெளியிட்ட தகவலின்படி, காஸாவில் ஏற்பட்ட பரவலான வெள்ளப்பெருக்கு மற்றும் மண்சரிவு காரணமாகப் பலர் உயிரிழந்துள்ளனர்.
மேலும், ஆயிரக்கணக்கான தற்காலிகத் தங்குமிடங்கள் சேதமடைந்துள்ளதுடன், அத்தியாவசிய சேவைகளும் பாதிக்கப்பட்டுள்ளன.
இதற்கிடையில், ஐரோப்பிய ஒன்றியமும் கடந்த சனிக்கிழமை வெளியிட்ட அறிக்கையில் காஸாவில் தொடரும் மனிதாபிமான நெருக்கடி குறித்து ஆழ்ந்த கவலை வெளியிட்டுள்ளது. சர்வதேச சட்டங்களைப் பின்பற்றுமாறும் இஸ்ரேலிடம் வலியுறுத்தியுள்ளது.
தொடரும் போரும் உயிரிழப்புகளும்
2023 ஒக்டோபர் 7ஆம் திகதி தெற்கு இஸ்ரேல் மீது ஹமாஸ் தலைமையிலான குழு நடத்திய தாக்குதலே காஸா போர் ஆரம்பமாவதற்குக் காரணமாக அமைந்தது. அந்தத் தாக்குதலில் சுமார் 1,200 பேர் கொல்லப்பட்டதுடன், 251 பேர் பணயக்கைதிகளாகக் கொண்டு செல்லப்பட்டனர்.
இதற்குப் பதிலடியாக இஸ்ரேல் காஸா மீது இராணுவ நடவடிக்கைகளை ஆரம்பித்தது. இதுவரை 74,690-க்கும் அதிகமானோர் கொல்லப்பட்டுள்ளதாக ஹமாஸ் நிர்வகிக்கும் காஸா சுகாதார அமைச்சின் புள்ளிவிபரங்கள் தெரிவிக்கின்றன. இந்தப் புள்ளிவிபரங்கள் ஐக்கிய நாடுகள் சபையால் நம்பகமானவையாகக் கருதப்படுகின்றன.
கடந்த ஆண்டு ஒக்டோபரில் போர்நிறுத்த ஒப்பந்தம் எட்டப்பட்டிருந்த போதிலும், இஸ்ரேலிய வான்வழித் தாக்குதல்கள் உள்ளிட்ட இராணுவ நடவடிக்கைகள் கிட்டத்தட்ட ஒவ்வொரு நாளும் தொடர்வதாகத் தெரிவிக்கப்படுகிறது.
இந்நிலையில், குளிர்காலம் தீவிரமடைவதற்கு முன்னர் காஸா மக்களுக்குத் தேவையான கூடாரங்கள், உணவு மற்றும் அத்தியாவசிய மனிதாபிமான உதவிகளைத் தடையின்றி வழங்குவதற்கான நடவடிக்கைகளை விரைவுபடுத்த வேண்டும் என்ற சர்வதேச அழுத்தம் அதிகரித்துள்ளது.





