இலங்கையின் மொத்த அரசுத் துறை கடன் 2026 மார்ச் மாத இறுதியில் சுமார் 102.2 பில்லியன் அமெரிக்க டொலராக இருந்ததாக நிதி இராஜாங்க அமைச்சர் அனில் ஜயந்த பெர்னாண்டோ நாடாளுமன்றத்தில் தெரிவித்தார்.
அவர் வெளியிட்ட தகவலின்படி, பொது கடன் முகாமைத்துவ அலுவலகத்தின் (PDMO) தரவுகளின் அடிப்படையில், மத்திய அரசின் கடன் மட்டும் 98.96 பில்லியன் அமெரிக்க டொலராக பதிவாகியுள்ளது.
மாகாண சபைகள், உள்ளூராட்சி அமைப்புகள் மற்றும் அரச நிறுவனங்களின் கடன்களையும் சேர்த்துக் கணக்கிடும் போது, நாட்டின் மொத்த அரசுத் துறை கடன் 102.2 பில்லியன் அமெரிக்க டொலராக உயர்வதாக அவர் குறிப்பிட்டார்.
மேலும், நாணய மாற்று விகித மாற்றங்களால் ரூபாய் மதிப்பில் கடன் அதிகரிப்பது, உண்மையில் கடன் அதிகரித்ததைக் குறிக்காது என்றும் அவர் விளக்கமளித்தார்.
“டொலரில் பெறப்பட்ட கடன் டொலரிலேயே இருக்கும்; ரூபாயில் பெறப்பட்ட கடன் ரூபாயிலேயே இருக்கும். நாணய மாற்று விகித மாற்றங்களால் ரூபாய் மதிப்பு மட்டும் மாறுகிறது. அது புதிய கடன் அல்ல; மாற்று விகித இழப்பாகும்,” என அமைச்சர் தெரிவித்தார்.
அரசின் முக்கிய இலக்கு கடனை திருப்பிச் செலுத்தும் திறனை உறுதிப்படுத்துவதாகவும், கடனின் நிலைத்தன்மையே கவனிக்கப்பட வேண்டிய முக்கிய அம்சம் என்றும் அவர் வலியுறுத்தினார்.
இதற்கிடையில், எதிர்க்கட்சி நாடாளுமன்ற உறுப்பினர் ரவி கருணாநாயக்க, பொதுநிதி தொடர்பான குழுவில் (COPF) சமர்ப்பிக்கப்பட்ட தரவுகளின்படி இலங்கையின் மொத்த கடன் 34 டிரில்லியன் ரூபாய் எனக் குறிப்பிடப்பட்டுள்ளதாக சுட்டிக்காட்டி, இரு தரவுகளுக்கும் இடையிலான வேறுபாடு குறித்து கேள்வி எழுப்பினார்.
