சிங்கப்பூரில் பொதுப் பேருந்துகளில் பயணிகளின் ஒழுங்கையும், பிற பயணிகளின் வசதியையும் உறுதி செய்யும் வகையில் புதிய விதிமுறைகள் அறிமுகப்படுத்தப்பட்டுள்ளன.
இதன்படி, பேருந்து இருக்கைகளில் கால்களை வைப்பது, சத்தமாக ஆடியோ அல்லது இசையை ஒலிக்கச் செய்வது, பேருந்துக்குள் உணவு அல்லது பானங்களை உட்கொள்வது, குப்பை கொட்டுவது போன்ற செயல்களுக்கு அதிகபட்சமாக 500 சிங்கப்பூர் டொலர் அபராதம் விதிக்கப்படலாம்.
மேலும், பிற பயணிகளுக்கு இடையூறு அல்லது ஆபத்தை ஏற்படுத்துதல், பேருந்து அல்லது பேருந்து நிலையத்தை அழுக்குபடுத்துதல் போன்ற கடுமையான விதிமீறல்களுக்கு 5,000 சிங்கப்பூர் டொலர் வரை அபராதம் விதிக்கப்படலாம்.
சிங்கப்பூரின் நிலப் போக்குவரத்து ஆணையம் (LTA) இந்த விதிமுறைகள் மூலம் அனைவருக்கும் பாதுகாப்பான மற்றும் பிறரை கருத்திற்கொள்ளும் பொதுப் போக்குவரத்து சூழலை உருவாக்குவதே நோக்கம் என தெரிவித்துள்ளது.
புதிய விதிகளின் கீழ், டிக்கெட் பரிசோதகர்கள் மற்றும் பேருந்து நிலையப் பணியாளர்கள் உள்ளிட்ட அங்கீகரிக்கப்பட்ட பணியாளர்களுக்கு விதிமீறல்களுக்கு எதிராக அதிகாரப்பூர்வ அறிவிப்புகளை வழங்கும் அதிகாரம் வழங்கப்பட்டுள்ளது.
எனினும், பேருந்து ஓட்டுநர்களுக்கு இந்த அதிகாரம் வழங்கப்படவில்லை. அவர்கள் பேருந்தை பாதுகாப்பாக இயக்குவதில் கவனம் செலுத்துவதுடன், ஒழுங்கீனமான நடத்தையை நிறுத்துமாறு பயணிகளுக்கு அறிவுறுத்த முடியும். கடுமையான சூழ்நிலைகளில் பொலிஸாரின் உதவியும் பெறப்படலாம்.
இந்த புதிய விதிமுறைகள், சிங்கப்பூர் MRT ரயில் சேவைகளில் ஏற்கனவே நடைமுறையில் உள்ள சில விதிகளுடன் ஒத்துப்போகின்றன.
