நாட்டின் பொதுப் போக்குவரத்து சேவையின் பாதுகாப்பை மேம்படுத்தும் நோக்கில் மஹரகம நவின்ன பஸ் நிலையத்தில் நேற்று (23) நடத்தப்பட்ட திடீர் போதைப்பொருள் பரிசோதனையில், 13 பஸ் சாரதிகள் மற்றும் நடத்துநர்கள் போதைப்பொருள் பயன்படுத்தியமை உறுதிப்படுத்தப்பட்டுள்ளது.
போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சின் தேசிய வேலைத்திட்டத்தின் கீழ் முன்னெடுக்கப்பட்ட இந்த மொபைல் போதைப்பொருள் பரிசோதனை நடவடிக்கையில், இலங்கை போக்குவரத்து சபை (SLTB) மற்றும் மேல் மாகாண சாலைப் பயணிகள் போக்குவரத்து அதிகாரசபையின் கீழ் இயங்கும் தனியார் பஸ்களின் 200 சாரதிகள் மற்றும் நடத்துநர்கள் பரிசோதனைக்கு உட்படுத்தப்பட்டனர்.
தேசிய போக்குவரத்து மருத்துவ நிறுவகத்தின் (NTMI) மருத்துவ அதிகாரி டாக்டர் J.M. லயனல் தெரிவித்ததாவது, காலை 9.00 மணி முதல் நண்பகல் 12.00 மணி வரை சேகரிக்கப்பட்ட சிறுநீர் மாதிரிகள் பரிசோதிக்கப்பட்டதில், 13 பேர் போதைப்பொருள் பயன்படுத்தியிருந்தமை கண்டறியப்பட்டது என்றார்.
இந்த திடீர் மொபைல் போதைப்பொருள் பரிசோதனைத் திட்டம் 2025 நவம்பரில் மகும்புர பல்முகப் போக்குவரத்து மையத்தில் ஆரம்பிக்கப்பட்டதுடன், பின்னர் கொழும்பு, கம்பஹா மற்றும் களுத்துறை மாவட்டங்களிலும் முன்னெடுக்கப்பட்டு வருகிறது.
தேசிய போக்குவரத்து மருத்துவ நிறுவகத்தின் தலைவர் பேராசிரியர் கிளிபோர்ட் பெரேரா தெரிவிக்கையில், 2026 ஜனவரி முதல் ஜூன் 12 வரை 4,322 பஸ் சாரதிகள் மற்றும் நடத்துநர்கள் பரிசோதிக்கப்பட்டதாகவும், அவர்களில் 226 பேர் ICE, ஹெரோயின், கஞ்சா மற்றும் பார்பிட்யூரேட் உள்ளிட்ட போதைப்பொருட்களை பயன்படுத்தியிருந்ததாகவும் கூறினார்.
இந்த பரிசோதனை நடவடிக்கை தேசிய போக்குவரத்து மருத்துவ நிறுவகத்தின் மருத்துவ மற்றும் ஆய்வக ஊழியர்களால் முன்னெடுக்கப்பட்டதுடன், மஹரகம பொலிஸ் போக்குவரத்து பிரிவினரின் உதவியும் வழங்கப்பட்டிருந்தது.
