கொழும்பு | ஆகஸ்ட் 08, 2026
கேளனி பள்ளத்தாக்கு (KV) ரயில் பாதையை இரத்தினபுரி வரை நீடித்தல், புறநகர் ரயில் சேவைகளை மின்மயமாக்கல் மற்றும் புதிய ரயில் தொகுதிகளை கொள்வனவு செய்தல் உள்ளிட்ட பல முக்கிய திட்டங்கள் முன்னெடுக்கப்பட்டு வருவதாக போக்குவரத்து மற்றும் நெடுஞ்சாலைகள் பிரதி அமைச்சர் பிரசன்ன குணசேன தெரிவித்துள்ளார்.
நாடாளுமன்றத்தில் ரயில்வே துறையின் எதிர்காலத் திட்டங்கள் தொடர்பில் கருத்து தெரிவிக்கும்போதே அவர் இதனை குறிப்பிட்டுள்ளார்.
அவிசாவளையிலிருந்து இரத்தினபுரி வரை கேளனி பள்ளத்தாக்கு ரயில் பாதையை நீடிப்பதற்கான சாத்தியக்கூறு ஆய்வு தற்போது இடம்பெற்று வருவதுடன், அது எதிர்வரும் டிசம்பர் மாதத்திற்குள் நிறைவடையும் என எதிர்பார்க்கப்படுகிறது. ஆய்வு நிறைவடைந்ததன் பின்னர் விரிவான வடிவமைப்பு மற்றும் கொள்வனவு நடவடிக்கைகள் முன்னெடுக்கப்படவுள்ளன.
அத்துடன், கொஸ்கம – அவிசாவளை ரயில் பாதையில் காணப்படும் நான்கு ரயில் கடவைகளால் ஏற்படும் போக்குவரத்து நெரிசலைத் தீர்ப்பதற்கான திட்டங்கள் ரயில்வே திணைக்களம் மற்றும் வீதி அபிவிருத்தி அதிகாரசபையினால் (RDA) கூட்டாக தயாரிக்கப்பட்டு வருகின்றன.
மேலும், பொல்கஹவெல – குருநாகல் ரயில் பாதையை இரட்டை பாதையாக மாற்றும் திட்டமும் முன்னெடுக்கப்படவுள்ளது.
கொழும்பு புறநகர் ரயில் சேவையை மின்மயமாக்குவதற்கான சாத்தியக்கூறு ஆய்வும் தற்போது நடைபெற்று வருவதுடன், இதற்கான கட்டுமானப் பணிகளை அடுத்த ஆண்டு ஆரம்பிக்க எதிர்பார்க்கப்படுவதாக பிரதி அமைச்சர் தெரிவித்துள்ளார்.
கடற்கரை ரயில் பாதையில் ரயில் தாமதங்களைக் குறைக்கும் வகையில் புனரமைக்க வேண்டிய 12 பாலங்கள் அடையாளம் காணப்பட்டுள்ளன. அவற்றில் இரண்டு பாலங்களுக்கான ஒப்பந்தங்கள் வழங்கப்பட்டுள்ளதுடன், ஏனைய 10 பாலங்களுக்கான ஒப்பந்தங்களும் இந்த ஆண்டின் இறுதிக்குள் வழங்கப்படும் என எதிர்பார்க்கப்படுகிறது.
கடற்கரை ரயில் பாதையின் தண்டவாள நிலைமையை மேம்படுத்துவதற்காக 10,000 ரயில் கிளிப்புகள் கொள்வனவு செய்யப்பட்டுள்ளன. மத்திய கிழக்கில் நிலவும் மோதல் காரணமாக அவற்றின் விநியோகம் தாமதமடைந்துள்ள போதிலும், இன்னும் ஒரு மாதத்திற்குள் அவை கிடைக்கும் என எதிர்பார்க்கப்படுகிறது.
இதனிடையே, ஐந்து புதிய டீசல் பல அலகு (DMU) ரயில் தொகுதிகளை கொள்வனவு செய்வதற்கான நடவடிக்கை தற்போது மதிப்பீட்டின் இடைக்கட்டத்தில் உள்ளதாகவும், இந்த ஆண்டின் இறுதிக்குள் ஒப்பந்தத்தை வழங்க ரயில்வே திணைக்களம் எதிர்பார்ப்பதாகவும் பிரதி அமைச்சர் தெரிவித்தார்.
மேலும், 2027ஆம் ஆண்டுக்கான பொது முதலீட்டு திட்டத்தின் (PIP) கீழ் ஐந்து இரு திசை இயக்க ரயில் தொகுதிகள் மற்றும் ஐந்து புதிய என்ஜின்களை கொள்வனவு செய்வதற்கான முன்மொழிவுகளும் சமர்ப்பிக்கப்பட்டுள்ளதாக தெரிவிக்கப்பட்டுள்ளது.
