இஸ்ரேல் பிரதமர் பெஞ்சமின் நெதன்யாகு ஐக்கிய நாடுகள் பொதுச் சபையில் உரையாற்றத் தொடங்கியபோது, பல நாடுகளைச் சேர்ந்த டஜன் கணக்கான பிரதிநிதிகள் சபை அரங்கிலிருந்து வெளியேறினர்.
ஐ.நா. பொதுச் சபையின் 81ஆவது அமர்வில் நேற்று (24) நெதன்யாகு உரையாற்றினார். அவர் உரையாற்றுவதற்கு முன்னரும், நியூயோர்க்கில் ஐ.நா. தலைமையகத்திற்கு வெளியே இஸ்ரேலின் காஸா நடவடிக்கைகளுக்கு எதிராக ஆர்ப்பாட்டங்கள் இடம்பெற்றன.
நெதன்யாகு உரையை ஆரம்பித்தபோது பல பிரதிநிதிகள் ஒருங்கிணைந்து அரங்கிலிருந்து வெளியேறியதுடன், இந்த நடவடிக்கை இஸ்ரேலின் காஸா போருக்கு எதிரான எதிர்ப்பை வெளிப்படுத்தும் வகையில் இடம்பெற்றதாக சர்வதேச ஊடகங்கள் தெரிவித்துள்ளன.
அரங்கிலிருந்து பிரதிநிதிகள் வெளியேறியதைத் தொடர்ந்து, நெதன்யாகு அவர்களை “moral cowards” எனக் குறிப்பிட்டதுடன், இஸ்ரேலின் நடவடிக்கைகளை அவர் தனது உரையில் பாதுகாத்துப் பேசினார்.
காஸாவில் இடம்பெறும் போருடன் தொடர்பாக இஸ்ரேலுக்கு எதிராக பல உலகத் தலைவர்கள் இந்த ஆண்டின் பொதுச் சபை அமர்வுகளில் விமர்சனங்களை முன்வைத்துள்ள நிலையில், காஸாவில் இனப்படுகொலை இடம்பெறுவதாக முன்வைக்கப்படும் குற்றச்சாட்டுகளை இஸ்ரேல் நிராகரித்துள்ளது. நெதன்யாகுவும் அந்தக் குற்றச்சாட்டுகளை மறுத்து, இஸ்ரேல் தற்காப்புக்காகவே செயற்படுவதாக வலியுறுத்தினார்.
இதனிடையே, நெதன்யாகுவின் உரையின்போது சில பிரதிநிதிகள் அரங்கில் இருந்து வெளியேறிய நிலையில், அவருக்கு ஆதரவாக பார்வையாளர் அரங்கில் இருந்து சிலர் கோஷங்களை எழுப்பியதாகவும் தெரிவிக்கப்பட்டுள்ளது.
