பெரும் வங்கி வீழ்ச்சியைத் தொடர்ந்து, பரகுவே ஜனாதிபதி சாண்டியாகோ பென்யாவுக்கு (Santiago Peña) எதிராக குற்றவியல் விசாரணைகள் ஆரம்பிக்கப்பட்டுள்ளதுடன், அவரைப் பதவியிலிருந்து நீக்குவதற்கான நாடாளுமன்ற நடவடிக்கைகளும் முன்னெடுக்கப்பட்டுள்ளன.

ஜனாதிபதியுடன் வணிகத் தொடர்புகள் இருந்ததாகக் கூறப்படும் தனியார் வங்கியான Ueno Bank, நிதி நெருக்கடி காரணமாக திடீரென மூடப்பட்டதைத் தொடர்ந்து இந்தச் சர்ச்சை உருவாகியுள்ளது. இதனால் மில்லியன் கணக்கான வாடிக்கையாளர்களால் தமது வைப்புப் பணத்தைப் பெற்றுக்கொள்ள முடியாத நிலை ஏற்பட்டுள்ளது.

இந்த வங்கி நெருக்கடி தொடர்பாக ஜனாதிபதி பென்யா மற்றும் முன்னாள் அதிகாரிகளுக்கு எதிராக பரகுவே சட்டமா அதிபர் மூன்று குற்றவியல் விசாரணைகளை ஆரம்பித்துள்ளார்.

ஜனாதிபதியின் பதவி விலகல் அறிவிப்பு

வியாழக்கிழமை (நவம்பர் 05) நாடாளுமன்றத்தில் தமக்கு எதிரான குற்றச்சாட்டுகள் விவாதிக்கப்பட்டுக் கொண்டிருந்த நிலையில், ஜனாதிபதி சாண்டியாகோ பென்யா பதவி விலகுவதாக அறிவித்தார்.

நாட்டின் ஸ்திரத்தன்மை, சமூக அமைதி மற்றும் அரச நிறுவனங்களைப் பாதுகாப்பதைக் கருத்திற்கொண்டு இந்த முடிவை எடுத்துள்ளதாக அவர் தெரிவித்தார்.

எனினும், அவரது பதவி விலகல் அறிவிப்பைத் தொடர்ந்து, பிரதிநிதிகள் சபை பதவி நீக்க நடவடிக்கைகளை ஆரம்பிப்பதற்கு ஏகமனதாக வாக்களித்துள்ளது. இதனைத் தொடர்ந்து செனட் சபையும் பதவி நீக்க விசாரணையை ஆரம்பிப்பதாக அறிவித்துள்ளது.

ஜனாதிபதி மீதான குற்றச்சாட்டுகளில், வங்கி விவகாரத்துடன் தொடர்புடைய தனது கடமைகளைத் தீவிரமாகவும் தொடர்ச்சியாகவும் புறக்கணித்ததாகக் கூறப்படுகின்றது.

செனட் சபையில் விசாரணை

தமக்கு எதிரான விசாரணையில் நேரில் ஆஜராகி, ஆதாரங்களுடனும் விளக்கங்களுடனும் தனது தரப்பை முன்வைக்கத் தயாராக இருப்பதாக பென்யா தெரிவித்துள்ளார்.

வியாழக்கிழமை இரவு செனட் சபையில் ஆரம்பமான பதவி நீக்க விசாரணை வெள்ளிக்கிழமையும் தொடரும் என எதிர்பார்க்கப்படுகிறது.

இதற்கிடையில், ஜனாதிபதியின் பதவி விலகல் தொடர்பாக நாடாளுமன்றத்தின் இரு அவைகளும் இணைந்து நடத்திய அமர்வு, சில உறுப்பினர்கள் வாக்கெடுப்பிலிருந்து வெளியேறியதைத் தொடர்ந்து எந்தத் தீர்மானமும் இன்றி ஒத்திவைக்கப்பட்டது.

ஜனாதிபதியின் பதவி விலகல் ஏற்றுக்கொள்ளப்பட்டால் அவருக்கு சட்டப் பாதுகாப்பு மற்றும் சிறப்புச் சலுகைகள் கிடைக்கக்கூடும் என்றும், பதவி நீக்கப்பட்டால் அவ்வாறான பாதுகாப்புகள் கிடைக்காது என்றும் செய்தியில் குறிப்பிடப்பட்டுள்ளது.

வங்கி நெருக்கடியின் பின்னணி

2.9 மில்லியன் வாடிக்கையாளர்களைக் கொண்ட Ueno Bank, பரகுவேயின் மத்திய வங்கியின் கண்காணிப்பின் கீழ் கொண்டுவரப்பட்டதைத் தொடர்ந்து அதன் நிதி நிலைமை தொடர்பான பிரச்சினைகள் வெளிச்சத்துக்கு வந்தன.

வங்கியின் நிதி அறிக்கைகளில் மேற்கொள்ளப்பட்ட திருத்தங்களின் விளைவாக, அதன் மூலதனப் போதுமான விகிதம் கட்டாயமாகப் பேணப்பட வேண்டிய குறைந்தபட்ச அளவின் 50 சதவீதத்திற்கும் கீழ் வீழ்ச்சியடைந்ததாக மத்திய வங்கி தெரிவித்துள்ளது.

மேலும், தொடர்புடைய நிறுவனங்களுக்கு வழங்கப்படும் கடன்களுக்கான வரம்புகளை வங்கி மீறியதாகவும் அதிகாரிகள் குறிப்பிட்டுள்ளனர்.

ஜனாதிபதியின் ஆட்சிக்காலத்தில் சமூகப் பாதுகாப்பு நிறுவனம் (IPS) உள்ளிட்ட அரச நிறுவனங்களிலிருந்து இந்த வங்கிக்கு பெருமளவு நிதி வைக்கப்பட்டமை குறித்தும் விசாரணைகள் முன்னெடுக்கப்படுகின்றன.

வங்கியின் சில வாடிக்கையாளர்களுக்கான வைப்புப் பண உத்தரவாதத் தொகைகளை கட்டம் கட்டமாக வழங்கும் நடவடிக்கைகளை ஆரம்பிக்கவுள்ளதாக பரகுவே மத்திய வங்கி அறிவித்துள்ளது.

இதற்கிடையில், ஜனாதிபதி நாட்டை விட்டு வெளியேறிவிட்டதாகப் பரவிய தகவல்களை ஜனாதிபதி அலுவலகப் பேச்சாளர் மறுத்துள்ளார். அவர் தலைநகரிலேயே இருப்பதாகவும் தெரிவிக்கப்பட்டுள்ளது.