நியூசிலாந்தின் வடக்குத் தீவின் தெற்குக் கரையோரத்தில் பெருமளவில் கரை ஒதுங்கிய 43 பைலட் திமிங்கிலங்களும் உயிரிழந்துள்ளதாக அந்நாட்டு பாதுகாப்புத் திணைக்களம் (DOC) தெரிவித்துள்ளது.

நவம்பர் 5ஆம் திகதி வியாழக்கிழமை காலை சுமார் 8 மணியளவில், நியூசிலாந்தின் வடக்குத் தீவின் தெற்கு முனையிலுள்ள கேப் பல்லிசர் (Cape Palliser) அருகேயுள்ள ந்காவி (Ngawi) கடற்கரைப் பகுதியில் திமிங்கிலங்கள் கரை ஒதுங்கியிருப்பது கண்டறியப்பட்டது.

ஆரம்பத்தில் குறைந்தது 20 திமிங்கிலங்கள் கரையில் சிக்கியிருந்ததாகவும், அவற்றில் நான்கு உயிருடன் காணப்பட்டதாகவும் கடல்வாழ் உயிரினங்களைப் பாதுகாக்கும் Project Jonah New Zealand அமைப்பு தெரிவித்திருந்தது. இதனையடுத்து, அந்நாட்டு பாதுகாப்புத் திணைக்களம், உள்ளூர் மவோரி பழங்குடி சமூகத்தினர் மற்றும் தன்னார்வலர்கள் இணைந்து மீட்பு நடவடிக்கைகளை முன்னெடுத்தனர்.

உயிருடன் இருந்த திமிங்கிலங்களின் உடல்நிலையை மதிப்பீடு செய்து, கடல் நீர்மட்டம் உயரும்போது அவற்றை மீண்டும் கடலுக்குள் அனுப்புவதற்கான முயற்சிகளும் மேற்கொள்ளப்பட்டன. எனினும், நவம்பர் 6ஆம் திகதி வெள்ளிக்கிழமை வெளியிடப்பட்ட அறிவிப்பில், ந்காவி முதல் மங்கடோட்டோ (Mangatoetoe) வரையிலான கடற்கரைப் பகுதியில் மொத்தம் 43 திமிங்கிலங்கள் கரை ஒதுங்கியிருந்ததாகவும், அவற்றில் எதுவும் உயிர் பிழைத்திருக்கவில்லை என நம்பப்படுவதாகவும் பாதுகாப்புத் திணைக்களம் தெரிவித்தது.

பல கிலோமீற்றர் நீளமான கடற்கரைப் பகுதியில் திமிங்கிலங்கள் சிதறிக் காணப்பட்டதாகவும், மீட்புக் குழுவினர் அங்கு சென்றபோதே பல திமிங்கிலங்கள் உயிரிழந்திருந்ததாகவும் Project Jonah அமைப்பு குறிப்பிட்டுள்ளது. உயிருடன் காணப்பட்ட திமிங்கிலங்களும் அன்றைய தினம் உயிரிழந்ததாக அந்த அமைப்பு தெரிவித்தது.

இந்தச் சம்பவம் மீட்புப் பணிகளில் ஈடுபட்டவர்களுக்கு மிகவும் கடினமானதும் மனவேதனையளிப்பதுமான அனுபவமாக இருந்ததாக Project Jonah அமைப்பு தெரிவித்துள்ளது. ஆரம்பத்தில் சம்பவ இடத்துக்குச் சென்ற உள்ளூர் மக்களுக்கும், உயிருடன் இருந்த திமிங்கிலங்களை குளிர்ச்சியாகவும் வசதியாகவும் வைத்திருக்க உதவியவர்களுக்கும் அந்த அமைப்பு நன்றியும் தெரிவித்துள்ளது.

மீட்புப் பணிகளுக்கு சவாலாக அமைந்த கடற்கரைச் சூழல்

கேப் பல்லிசர் பகுதியின் தெற்குக் கரையோரம், குக் நீரிணையின் (Cook Strait) வலுவான கடல் அலைகளுக்கு நேரடியாக முகங்கொடுக்கும் பகுதியாகும். அத்துடன், அங்குள்ள தளர்வான சரளைக் கற்கள் நிறைந்த கடற்கரையும் கூர்மையான பாறைகளும் மீட்புப் பணிகளை மேலும் சிக்கலாக்கியதாக Project Jonah தெரிவித்துள்ளது.

குறித்த இடம் தொலைதூரப் பகுதியில் அமைந்துள்ளமையும் மீட்புக் குழுவினருக்கு மேலதிக சவால்களை ஏற்படுத்தியுள்ளது.

உயிரிழந்த திமிங்கிலங்களின் உடல்களை அடக்கம் செய்வதற்கான நடவடிக்கைகளை உள்ளூர் மவோரி பழங்குடி சமூகத்தினருடன் இணைந்து முன்னெடுத்து வருவதாக நியூசிலாந்து பாதுகாப்புத் திணைக்களம் தெரிவித்துள்ளது. மவோரி சமூகத்தினர் இத்தகைய உயிரினங்களை உயர்ந்த பாரம்பரிய மதிப்புடையவையாகக் கருதுகின்றனர்.

திமிங்கிலங்கள் ஏன் கூட்டமாகக் கரை ஒதுங்குகின்றன?

பைலட் திமிங்கிலங்கள் கூட்டமாகக் கரை ஒதுங்கும் தன்மை கொண்ட கடல்வாழ் பாலூட்டிகளாக அறியப்படுகின்றன. எனினும், இவ்வாறான கூட்டமான கரையொதுங்கல்களுக்கான துல்லியமான காரணம் இதுவரை முழுமையாகப் புரிந்துகொள்ளப்படவில்லை.

ஸ்கொட்லாந்தின் செயின்ட் ஆண்ட்ரூஸ் பல்கலைக்கழக உயிரியல் பேராசிரியரும், பிரித்தானிய சுற்றுச்சூழல் துறையின் முன்னாள் தலைமை அறிவியல் ஆலோசகருமான இயன் எல். பொய்ட் (Ian L. Boyd) தெரிவிக்கையில், அதிக சமூகத் தொடர்புகளைக் கொண்ட உயிரினங்களில் இவ்வாறான சம்பவங்கள் இடம்பெறுவதற்கான வாய்ப்புகள் அதிகம் எனக் குறிப்பிட்டுள்ளார்.

ஒரு திமிங்கிலம் வழிதவறி ஆழமற்ற நீர்ப்பகுதிக்குள் சென்றால், அதனுடன் தொடர்புடைய ஏனைய திமிங்கிலங்களும் அதனைப் பின்தொடர்ந்து கரையில் சிக்கிக்கொள்ளக்கூடும் என நிபுணர்கள் விளக்குகின்றனர்.

மேலும், பைலட் திமிங்கிலங்கள் ஒலி எதிரொலிப்பு முறையைப் பயன்படுத்தி தமது சுற்றுப்புறத்தை அறிந்துகொள்கின்றன. ஆனால், ஆழமற்றதும் மெதுவாகச் சரிவடையும் கடற்பரப்பைக் கொண்ட பகுதிகளில் இந்த முறை அவற்றுக்குச் சரியாகப் பயன்படாமல் போகலாம் என நியூசிலாந்து பாதுகாப்புத் திணைக்களம் சுட்டிக்காட்டியுள்ளது.

நியூசிலாந்தில் தற்போது கோடைகாலம் நிலவுவதுடன், இக்காலப்பகுதியில் உணவு கிடைக்கும் இடங்களைத் தேடி திமிங்கிலங்கள் கரையோரப் பகுதிகளுக்கு வருவது வழக்கமாகும். நாட்டில் அதிகளவிலான பைலட் திமிங்கிலங்கள் கரை ஒதுங்கிய மிகப்பெரிய சம்பவம் 1918ஆம் ஆண்டு சத்தம் தீவுகளில் (Chatham Islands) இடம்பெற்றதாகவும், அப்போது சுமார் 1,000 திமிங்கிலங்கள் கரை ஒதுங்கியதாகவும் பாதுகாப்புத் திணைக்களத்தின் பதிவுகள் தெரிவிக்கின்றன.

இதற்கு முன்னரும் ஓசியானியா பிராந்தியத்தில் இவ்வாறான சம்பவங்கள் பதிவாகியுள்ளன. 2022ஆம் ஆண்டு நியூசிலாந்தின் தொலைதூரத் தீவுகளுக்கு அருகில் சுமார் 500 பைலட் திமிங்கிலங்கள் உயிரிழந்தன. 2025ஆம் ஆண்டு அவுஸ்திரேலியாவின் தஸ்மானியா கடற்கரையில் 150க்கும் மேற்பட்ட திமிங்கிலங்கள் கரை ஒதுங்கிய நிலையில், அவற்றில் எதுவும் உயிர் பிழைக்கவில்லை.

இந்நிலையில், நியூசிலாந்தில் அண்மையில் இடம்பெற்றுள்ள இந்தச் சம்பவம் கடல்வாழ் உயிரினப் பாதுகாப்பு தொடர்பான கவலையை மீண்டும் ஏற்படுத்தியுள்ளது.