ரஷ்ய உளவுத்துறையின் சதித்திட்டம் முறியடிப்பு? ரஷ்யாவுடனான எல்லையை மூட எஸ்தோனியா தீர்மானம்!

ரஷ்யாவின் இராணுவ உளவுத்துறையுடன் தொடர்புடையதாகக் கூறப்படும் தீவைப்பு சதித்திட்டம் முறியடிக்கப்பட்டதைத் தொடர்ந்து, ரஷ்யாவுடனான தனது எல்லையை மூடுவதற்கு எஸ்தோனியா தீர்மானித்துள்ளது.

எஸ்தோனியாவின் பாதுகாப்புத் தொழில்நுட்ப நிறுவனமொன்றைக் குறிவைத்து நடத்தத் திட்டமிடப்பட்ட தீவைப்பு தாக்குதல் முயற்சி தொடர்பில் எட்டு பேர் கைது செய்யப்பட்டுள்ளதாக அந்நாட்டு அதிகாரிகள் தெரிவித்துள்ளனர்.

சனிக்கிழமை இரவு இடம்பெற்றதாகக் கூறப்படும் இந்தத் தாக்குதல் முயற்சியில் எவருக்கும் காயம் ஏற்படவில்லை. சம்பவம் தொடர்பான விசாரணைகளின் அடிப்படையில், ரஷ்ய இராணுவ உளவுத்துறை அமைப்பான GRU-வின் உத்தரவின் பேரில் இந்த நடவடிக்கை முன்னெடுக்கப்பட்டதாக எஸ்தோனிய பாதுகாப்புப் பிரிவினர் குற்றஞ்சாட்டியுள்ளனர்.

டிசம்பர் 1 முதல் எல்லை மூடல்

இந்தச் சம்பவத்தைத் தொடர்ந்து, ரஷ்யாவுடனான எல்லைக் கடப்பிடங்களை டிசம்பர் 1ஆம் திகதி முதல் மூடுவதற்கு எஸ்தோனியா நடவடிக்கை எடுக்கவுள்ளதாக அந்நாட்டுப் பிரதமர் கிறிஸ்டன் மிச்சல் ஞாயிற்றுக்கிழமை அறிவித்தார்.

ரஷ்யா தொடர்ந்து எஸ்தோனியாவில் கலப்பின நடவடிக்கைகளை (Hybrid Operations) முன்னெடுத்தால், அதனால் ஏற்படக்கூடிய அச்சுறுத்தல்களைக் குறைப்பதற்குத் தேவையான நடவடிக்கைகளை எடுக்க வேண்டியிருக்கும் என அவர் குறிப்பிட்டார்.

மேலும், ரஷ்ய உளவுத்துறை அமைப்புகள் எல்லைக் கடப்பிடங்களைப் பயன்படுத்தி மக்களிடையே செல்வாக்குச் செலுத்த முயற்சிப்பதாகவும் அவர் குற்றஞ்சாட்டினார்.

எஸ்தோனியாவின் பாதுகாப்புத் தொழில்துறை மற்றும் பாதுகாப்புத் திறன்களை இலக்குவைத்து நடத்தப்படும் தாக்குதல்களை ஏற்றுக்கொள்ள முடியாது என்பதைத் தெளிவுபடுத்துவதற்கும், அந்நாட்டு மக்களின் பாதுகாப்பை உறுதிப்படுத்துவதற்கும் எல்லையை மூடுவது உதவும் என பிரதமர் தெரிவித்தார்.

எவ்வாறாயினும், மூடப்படும் எல்லைக் கடப்பிடங்கள் மீண்டும் எப்போது திறக்கப்படும் என்பது தொடர்பில் அவர் எந்தத் தகவலையும் வெளியிடவில்லை.

ரஷ்யா கடும் எதிர்ப்பு

எஸ்தோனியாவின் இந்தத் தீர்மானத்தை ரஷ்யா கடுமையாக விமர்சித்துள்ளது.

ரஷ்ய வெளியுறவு அமைச்சின் பேச்சாளர் மரியா சகரோவா, இந்த நடவடிக்கை ரஷ்யாவுக்கு எதிரான வெறுப்புணர்வின் மற்றுமொரு வெளிப்பாடு எனக் குறிப்பிட்டுள்ளார்.

எஸ்தோனியாவின் திட்டங்கள் உண்மையானவையா என்பதை ஆராய்வதாகத் தெரிவித்த அவர், இத்தகைய நடவடிக்கை ரஷ்யாவுக்கு எதிரான ஆக்கிரமிப்பு மனப்பான்மையின் தொடர்ச்சியாக அமையும் என்றும் கூறியுள்ளார்.

ஐரோப்பிய நாடுகளின் பாதுகாப்பு குறித்து எச்சரிக்கை

எஸ்தோனிய வெளியுறவு அமைச்சர் மார்கஸ் சாக்னா, வார இறுதியில் இடம்பெற்றதாகக் கூறப்படும் நாசவேலை முயற்சி, ரஷ்யாவின் விரோத நடவடிக்கைகள் உக்ரைனுக்கு அப்பாலும் பரவியுள்ளதை மீண்டும் நினைவூட்டுவதாகத் தெரிவித்துள்ளார்.

இத்தகைய விரோத நடவடிக்கைகளுக்குப் பதிலடி நடவடிக்கைகள் அவசியம் என்றும் அவர் குறிப்பிட்டுள்ளார்.

மேலும், ரஷ்யாவுடன் தொடர்புடைய தனிநபர்கள் மற்றும் நிறுவனங்களுக்கு எதிராகப் புதிய தடைகள் விதிப்பது குறித்து பிரஸ்ஸல்ஸில் திங்கட்கிழமை நடைபெறவுள்ள ஐரோப்பிய ஒன்றிய வெளியுறவு அமைச்சர்களின் கூட்டத்தில் நடவடிக்கை எடுக்கப்படும் என எதிர்பார்ப்பதாகவும் அவர் தெரிவித்துள்ளார்.

எஸ்தோனியாவின் எல்லையை மூடும் தீர்மானத்திற்கு உக்ரைனும் ஆதரவு தெரிவித்துள்ளது.

உக்ரைன் வெளியுறவு அமைச்சர் ஆண்ட்ரி சிபிஹா, ரஷ்யாவின் நாசவேலை நடவடிக்கைகளுக்கு வெறுமனே இராஜதந்திரக் கண்டனங்களை வெளியிடுவதுடன் நின்றுவிடாமல், அதற்கு உரிய விளைவுகளை ஏற்படுத்த முடியும் என்பதை எஸ்தோனியா எடுத்துக்காட்டியுள்ளதாகத் தெரிவித்துள்ளார். ஐரோப்பாவின் ஏனைய நாடுகளும் இந்த அணுகுமுறைக்கு ஆதரவளிக்க வேண்டும் என்றும் அவர் வலியுறுத்தியுள்ளார்.

ஐரோப்பாவில் அதிகரிக்கும் பதற்றம்

ஐரோப்பிய நாடுகளில் நாசவேலைகள் மற்றும் ஏனைய கலப்பினத் தாக்குதல்களை ரஷ்யா முன்னெடுத்து வருவதாக நீண்டகாலமாகக் குற்றச்சாட்டுகள் முன்வைக்கப்பட்டு வருகின்றன. எனினும், இந்தக் குற்றச்சாட்டுகளை ரஷ்யா தொடர்ந்து மறுத்து வருகிறது.

கடந்த செப்டெம்பர் மாதத்திலும் நேட்டோ உறுப்பு நாடுகளை இலக்குவைத்து இடம்பெற்றதாகக் கருதப்பட்ட பல சம்பவங்களுக்குப் பின்னால் ரஷ்யா இருப்பதாக ஐரோப்பிய அதிகாரிகள் குற்றஞ்சாட்டியிருந்தனர்.

உக்ரைன் எல்லைக்கு அருகே போலந்தில் ரஷ்ய ட்ரோன் தாக்குதலில் ரயில் பாதை ஒன்று பாதிக்கப்பட்டதாகவும், லிதுவேனியாவில் ரஷ்யாவிலிருந்து வந்திருக்கலாம் எனச் சந்தேகிக்கப்பட்ட ட்ரோன் ஒன்று சுட்டு வீழ்த்தப்பட்டதாகவும் தகவல்கள் வெளியாகியிருந்தன.

மேலும், டென்மார்க்கில் ரஷ்யத் தொடர்புடையதாகக் கூறப்பட்ட ஒரு சம்பவத்தில் ஹெலிகொப்டர் ஒன்று ஆபத்தை எதிர்கொண்டதுடன், நெதர்லாந்தில் ரயில் பாதைகளில் உலோகக் குழாய்கள் பொருத்தப்பட்டதால் ரயில் போக்குவரத்தும் பாதிக்கப்பட்டதாகத் தெரிவிக்கப்பட்டது.

இந்தச் சம்பவங்கள் அனைத்திலும் ரஷ்யாவின் தொடர்பு உறுதிப்படுத்தப்படவில்லை. மாஸ்கோவும் தனது தொடர்பை மறுத்துள்ளது.

இந்நிலையில், எஸ்தோனியாவின் எல்லை மூடும் தீர்மானம், ரஷ்யாவுக்கும் ஐரோப்பிய நாடுகளுக்கும் இடையிலான பாதுகாப்பு மற்றும் அரசியல் பதற்றத்தை மேலும் அதிகரிக்கக்கூடும் எனக் கருதப்படுகிறது.

Tags

Share this post:

Leave a Reply

Your email address will not be published. Required fields are marked *

Lorem ipsum dolor sit amet, consectetur adipiscing elit, sed do eiusmod tempor incididunt ut labore et dolore