2026ஆம் ஆண்டின் கோடை காலம், பிரித்தானியாவின் வரலாற்றிலேயே அதிக வெப்பம் பதிவான கோடையாக அமைந்துள்ளதாக அந்நாட்டின் வானிலை ஆய்வு நிலையத்தின் தற்காலிக தரவுகள் தெரிவிக்கின்றன.
ஜூன் முதல் ஆகஸ்ட் வரையிலான காலப்பகுதியில் பிரித்தானியாவின் சராசரி வெப்பநிலை 16.5°C ஆக பதிவாகியுள்ளது. 1884ஆம் ஆண்டு தொடங்கிய பதிவுகளுடன் ஒப்பிடுகையில் இது அதிகபட்ச கோடை சராசரி வெப்பநிலையாகும்.
இந்த கோடை காலத்தில் நாடு முழுவதும் 30°C அல்லது அதற்கு மேற்பட்ட வெப்பநிலை 40 நாட்களில் பதிவாகியுள்ளது. இதற்கு முன்னர் 1995ஆம் ஆண்டு 34 நாட்கள் பதிவானதே அதிகபட்சமாக இருந்தது.
மேலும், 35°C அல்லது அதற்கு அதிகமான வெப்பநிலை 10 நாட்களில் பதிவாகியுள்ளது. அதேபோன்று, 37°C-க்கும் அதிகமான வெப்பநிலை மூன்று நாட்களில் பதிவாகி புதிய சாதனை படைத்துள்ளது.
ஆகஸ்ட் 13ஆம் திகதி லண்டனில் உள்ள Kew Gardens பகுதியில் 38.1°C வெப்பநிலை பதிவானது. இது இந்த ஆண்டில் பிரித்தானியாவில் பதிவான அதிகபட்ச வெப்பநிலையாகும்.
இந்த காலப்பகுதியில் ஐந்து பரவலான வெப்ப அலைகள் ஏற்பட்டதுடன், சில பகுதிகளில் நீண்ட காலம் மழையின்மையும் காணப்பட்டது. இதன் காரணமாக இங்கிலாந்து மற்றும் வேல்ஸின் சில பகுதிகளில் வறட்சி நிலைமையும் ஏற்பட்டிருந்தது.
மனிதனால் ஏற்படுத்தப்படும் காலநிலை மாற்றத்தின் தாக்கம் காரணமாக, 2026 கோடையில் பதிவான சராசரி வெப்பநிலை ஏற்படுவதற்கான சாத்தியம் கணிசமாக அதிகரித்துள்ளதாக வானிலை ஆய்வாளர்கள் தெரிவித்துள்ளனர்.
காலநிலை மாற்றம் தொடரும் நிலையில், எதிர்காலத்தில் இதுபோன்ற தீவிர வெப்பநிலை நிகழ்வுகள் மேலும் அடிக்கடி ஏற்படக்கூடும் என நிபுணர்கள் எச்சரித்துள்ளனர்.
