இலங்கை போக்குவரத்துச் சபையின் சேவையை மேலும் வலுப்படுத்தும் வகையில், இந்த ஆண்டின் இறுதிக்குள் 800 புதிய பேருந்துகள் சேவையில் இணைக்கப்படவுள்ளதாக போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்க தெரிவித்துள்ளார்.

இதன்படி, 600 குளிரூட்டப்பட்ட பேருந்துகள் இறக்குமதி செய்யப்படவுள்ளதுடன், மேலும் 200 பேருந்துகள் இலங்கை போக்குவரத்துச் சபையின் சொந்த நிதியில் கொள்வனவு செய்யப்படவுள்ளதாகவும் அமைச்சர் குறிப்பிட்டுள்ளார்.

கடவத்தை மெட்ரோ பேருந்து நிலையத்தில் நேற்று (07) நடைபெற்ற உத்தியோகபூர்வ சேவை ஆரம்ப நிகழ்வில் கலந்து கொண்டு அமைச்சர் இந்த தகவல்களை வெளியிட்டார்.

மெட்ரோ பேருந்து சேவை விரிவாக்கம்

தற்போது இயங்கி வரும் மெட்ரோ பேருந்து சேவையின் பேருந்துகளின் எண்ணிக்கை இந்த மாதத்திற்குள் 122 ஆக அதிகரிக்கப்படவுள்ளதாக அமைச்சர் தெரிவித்தார்.

மேலும், கூடுதலாக 50 பேருந்துகளை கொள்வனவு செய்வதற்கான அமைச்சரவை அனுமதியைப் பெற நடவடிக்கை எடுக்கப்பட்டுள்ளதாகவும் அவர் கூறினார்.

இதன் மூலம் இந்த ஆண்டு இறுதிக்குள் அல்லது அடுத்த ஆண்டின் ஆரம்பத்தில் மெட்ரோ பேருந்து சேவையின் மொத்த பேருந்துகளின் எண்ணிக்கை 172 ஆக அதிகரிக்கும் என எதிர்பார்க்கப்படுகிறது.

கொழும்புக்கு வெளியேயும் சேவை

மெட்ரோ பேருந்து சேவையை மேல் மாகாணத்திற்கு மட்டுப்படுத்தாமல் காலி, கண்டி மற்றும் யாழ்ப்பாணம் உள்ளிட்ட பகுதிகளுக்கும் விரிவுபடுத்துவதற்கான திட்டங்கள் முன்னெடுக்கப்பட்டுள்ளதாக அமைச்சர் தெரிவித்தார்.

அத்துடன், மெட்ரோ நிறுவனத்துடன் இணைந்து பேருந்து சேவைகளை நடத்துவதற்கான வாய்ப்புகள் தனியார் துறையினருக்கும் வழங்கப்படவுள்ளதாக தெரிவிக்கப்பட்டுள்ளது.

நகர்ப்புற போக்குவரத்து நவீனமயமாக்கல்

நகர்ப்புற போக்குவரத்து கட்டமைப்பை நவீனமயப்படுத்தும் திட்டத்தின் கீழ், மெட்ரோ பேருந்து சேவைக்குத் தேவையான உட்கட்டமைப்பு வசதிகள் மேம்படுத்தப்பட்டு வருகின்றன.

இதற்கான பணிகள் போக்குவரத்து அமைச்சு, Clean Sri Lanka செயலகம், இலங்கை போக்குவரத்துச் சபை மற்றும் Lanka Metro Transit (Private) Company ஆகிய நிறுவனங்களின் ஒருங்கிணைப்பில் முன்னெடுக்கப்படுகின்றன.

கடந்த செப்டம்பர் 4ஆம் திகதி பத்தரமுல்லை – தலங்கம பகுதியில் முதலாவது மெட்ரோ பேருந்து நிலையம் பொதுமக்களின் பயன்பாட்டுக்காக ஒப்படைக்கப்பட்டது.

மேலும் தலங்கம, கடவத்தை, ஏகல மற்றும் இரத்மலானை ஆகிய இடங்களில் நான்கு புதிய பேருந்து நிலையங்களை அமைப்பதற்கும் திட்டமிடப்பட்டுள்ளது.

தற்போது மெட்ரோ சேவையின் முதலாவது வழித்தடம் மகும்புர முதல் கடவத்தை வரை, மகரகம ஊடாக இயக்கப்படுகிறது. இந்த வழித்தடத்தில் தற்போது 15 புதிய பேருந்துகள் சேவையில் ஈடுபடுத்தப்பட்டுள்ளன.

மேலும், பேருந்து நிறுத்தங்கள், ஒருங்கிணைந்த கட்டண செலுத்தும் முறை, பேருந்து நிலைய வசதிகள் மற்றும் வாகன நிறுத்துமிடங்கள் உள்ளிட்டவற்றை மேம்படுத்தி, பல்வேறு போக்குவரத்து சேவைகளுடன் மெட்ரோ சேவையை ஒருங்கிணைப்பதற்கும் நடவடிக்கை எடுக்கப்படவுள்ளது.