அறிவியலுக்கு இதுவரை அறியப்படாத புதிய காட்டுப் பூனை இனம் ஒன்று பொலிவியாவில் கண்டுபிடிக்கப்பட்டுள்ளதாக ஆராய்ச்சியாளர்கள் அறிவித்துள்ளனர். ஒரு நூற்றாண்டுக்கும் மேலான காலத்திற்குப் பின்னர் புதிதாக அடையாளம் காணப்படும் காட்டுப் பூனை இனமாக இது கருதப்படுகிறது.
Leopardus tilcayo என அறிவியல் பெயரிடப்பட்டுள்ள இந்த சிறிய பூனை, பொலிவியாவின் Yungas மேகக் காடுகளில் வாழ்கிறது. பழுப்பு நிற உடலில் சிறுத்தையைப் போன்ற புள்ளிகள் காணப்படுவதுடன், சாதாரண வீட்டுப் பூனையைவிடவும் சிறியதாக உள்ளது.
இது சுமார் 46 சென்டிமீட்டர் நீளமும் 1.4 கிலோகிராம் எடையும் கொண்டதாக ஆராய்ச்சியாளர்கள் தெரிவித்துள்ளனர்.
இந்த பூனை உள்ளூர் மக்களுக்கு நீண்ட காலமாக அறிமுகமான ஒன்றாக இருந்தபோதிலும், அறிவியல் ரீதியாக இது தனித்துவமான புதிய இனமாக தற்போது தான் உறுதி செய்யப்பட்டுள்ளது. உள்ளூர் சமூகங்கள் இதனை “Tilcayo” என அழைத்து வந்துள்ளதால், அந்த பெயரையே விஞ்ஞானிகள் பயன்படுத்தியுள்ளனர்.
ஆராய்ச்சியாளர்கள் மேற்கொண்ட மரபணு ஆய்வில், இந்த பூனை மற்ற Tiger Cat இனங்களிலிருந்து சுமார் 14 இலட்சம் ஆண்டுகளுக்கு முன்பே தனித்துப் பரிணமித்திருக்கலாம் என்பது தெரியவந்துள்ளது.
இந்த கண்டுபிடிப்பில் முக்கிய பங்கு வகித்த ஆராய்ச்சியாளர் Paola Nogales-Ascarrunz, முதன்முதலில் இந்த வித்தியாசமான பூனையை ஒரு வனவிலங்கு சரணாலயத்தில் பார்த்தபோது, அது மிகவும் சிறியதாக இருந்ததால் பூனைக்குட்டி என நினைத்ததாக தெரிவித்துள்ளார்.
மேலும், ஆராய்ச்சியாளர்கள் 38 பூனைகளின் மரபணு தரவுகளை ஆய்வு செய்ததன் மூலம், Tiger Cat குழுவில் ஐந்து தனித்துவமான இனங்கள் இருப்பதை உறுதிப்படுத்தியுள்ளனர்.
இந்நிலையில், இந்த புதிய இனத்தின் காட்டு வாழ்விடப் பரவலும், உலகில் தற்போது எத்தனை Leopardus tilcayo பூனைகள் உள்ளன என்பதும் இன்னும் தெளிவாக தெரியவில்லை. எனவே, அவற்றைப் பாதுகாப்பதற்கான மேலதிக ஆய்வுகள் அவசியம் என ஆராய்ச்சியாளர்கள் தெரிவித்துள்ளனர்.
