சவூதி அரேபியாவில் மரண தண்டனை விதிக்கப்பட்டுள்ள இலங்கையரான சிவராசா அனோஜனுக்கு மனிதாபிமான அடிப்படையில் மன்னிப்பு வழங்குமாறு, முன்னாள் இலங்கை கிரிக்கெட் அணித் தலைவர் சனத் ஜயசூரிய சவூதி அரேபிய அரசாங்கத்திடம் வேண்டுகோள் விடுத்துள்ளார்.
சமூக வலைத்தளத்தில் வெளியிட்டுள்ள பதிவொன்றின் மூலம் அவர் இந்த வேண்டுகோளை முன்வைத்துள்ளார்.
மதம் அல்லது இன வேறுபாடுகளைக் கடந்து, அனோஜனுக்கு ஆதரவாக இலங்கையர்கள் ஒன்றிணைந்து நிற்பதாகக் குறிப்பிட்டுள்ள சனத் ஜயசூரிய, அவருக்கு மன்னிப்பு வழங்குவது குறித்து சவூதி அரேபியா மனிதாபிமான அடிப்படையில் பரிசீலிக்க வேண்டும் எனக் கேட்டுக்கொண்டுள்ளார்.
🌍 சவூதி வெளிவிவகார அமைச்சருக்கும் நேரடி வேண்டுகோள்!
தனது சமூக வலைத்தளப் பதிவில் சவூதி அரேபிய வெளிவிவகார அமைச்சர் இளவரசர் பைசல் பின் ஃபர்ஹான் மற்றும் சவூதி வெளிவிவகார அமைச்சு ஆகியவற்றையும் சனத் ஜயசூரிய குறிப்பிட்டுள்ளார்.
அவரது இந்த வேண்டுகோள், அனோஜனுக்கு மன்னிப்பு வழங்கப்பட வேண்டும் என முன்வைக்கப்பட்டு வரும் கோரிக்கைகளுக்கு இலங்கை விளையாட்டுத்துறையிலிருந்தும் கிடைத்துள்ள முக்கிய ஆதரவாகக் கருதப்படுகிறது.
⚖️ அனோஜனுக்கு மரண தண்டனை விதிக்கப்பட்ட பின்னணி என்ன?
கல்முனையைச் சேர்ந்த இலங்கைப் பிரஜையான சிவராசா அனோஜன், சவூதி அரேபியாவில் புலம்பெயர் தொழிலாளியாகப் பணியாற்றியவர்.
சமூக வலைத்தளத்தில் வெளியிட்ட பதிவு இஸ்லாம் மதத்தை அவமதிப்பதாகக் கருதப்பட்டதையடுத்து, அவருக்கு சவூதி அரேபியாவில் மரண தண்டனை விதிக்கப்பட்டுள்ளதாகத் தெரிவிக்கப்பட்டுள்ளது.
இந்தத் தீர்ப்பை எதிர்த்து சட்டரீதியான நடவடிக்கைகளை முன்னெடுப்பதற்காக, இலங்கை சட்டத்தரணிகள் குழுவொன்று சவூதி அரேபிய சட்டத்தரணிகளுடன் இணைந்து செயற்பட்டு வருகிறது.
மேலும், தீர்ப்புக்கு எதிரான மேன்முறையீட்டை சவூதி அரேபிய உச்ச நீதிமன்றத்தில் தாக்கல் செய்வதற்கான நடவடிக்கைகளும் முன்னெடுக்கப்பட்டு வருவதாகத் தெரிவிக்கப்படுகிறது.
🇱🇰 இலங்கை அரசாங்கமும் இராஜதந்திர முயற்சிகளில் ஈடுபாடு
அனோஜனுக்கு மன்னிப்பு பெற்றுக்கொடுப்பதற்காக இலங்கை அரசாங்கமும் இராஜதந்திர ரீதியிலான முயற்சிகளை மேற்கொண்டு வருகிறது.
இந்நிலையில், சனத் ஜயசூரியவின் வேண்டுகோள் இந்த விவகாரத்தில் மேலும் கவனத்தை ஈர்த்துள்ளது.
சட்டரீதியான மேன்முறையீட்டு நடவடிக்கைகளும் இராஜதந்திர முயற்சிகளும் முன்னெடுக்கப்பட்டு வரும் நிலையில், அனோஜனின் தண்டனை தொடர்பில் சவூதி அரேபிய அதிகாரிகள் எத்தகைய முடிவை எடுக்கப்போகிறார்கள் என்பது எதிர்பார்ப்பை ஏற்படுத்தியுள்ளது.
