அமெரிக்காவின் லூசியானா மாநிலத்தில் அமைந்துள்ள நியூ ஆர்லியன்ஸ் துறைமுகத்திற்கு அருகே மிசிசிப்பி ஆற்றில் இடம்பெற்ற பாரிய கப்பல் விபத்தில், சுற்றுலாப் பயணிகள் கப்பலொன்று சரக்குக் கப்பலுடன் மோதியதில் ஒருபக்கமாகச் சாய்ந்து கவிழ்ந்துள்ளது. இந்த விபத்தில் காயமடைந்த 32 பேர் வைத்தியசாலைகளில் அனுமதிக்கப்பட்டுள்ளதுடன், கப்பலில் இருந்த அனைத்து பயணிகளும் பணியாளர்களும் பாதுகாப்பாக மீட்கப்பட்டுள்ளனர். உயிரிழப்புகள் எதுவும் பதிவாகவில்லை என அதிகாரிகள் உறுதிப்படுத்தியுள்ளனர்.
கடந்த நவம்பர் 13ஆம் திகதி வெள்ளிக்கிழமை உள்ளூர் நேரப்படி பிற்பகல் சுமார் 12.30 மணியளவில் இந்த விபத்து இடம்பெற்றுள்ளது. அட்லாண்டிக் அஸ்பால்ட் (Atlantic Asphalt) எனப்படும் சரக்குக் கப்பல், நியூ ஆர்லியன்ஸ் துறைமுகத்திற்கு அருகிலுள்ள மிசிசிப்பி ஆற்றில் நிறுத்தி வைக்கப்பட்டிருந்த அமெரிக்கன் ஹெரிடேஜ் (American Heritage) எனும் சுற்றுலாப் பயணிகள் கப்பலுடன் மோதியுள்ளது.
சுமார் 129 பயணிகள் கப்பலில் இருந்தனர்
அமெரிக்கன் குரூஸ் லைன்ஸ் (American Cruise Lines) நிறுவனத்தினால் இயக்கப்படும் அமெரிக்கன் ஹெரிடேஜ் கப்பல், விபத்து இடம்பெறுவதற்கு சுமார் இரண்டு மணித்தியாலங்களுக்கு முன்னர் துறைமுகத்தில் நிறுத்தப்பட்டிருந்தது. பயணிகளை இறக்கும் நடவடிக்கைகள் ஆரம்பிக்கப்படவிருந்த நிலையில், சரக்குக் கப்பல் அதனுடன் மோதியுள்ளது.
விபத்து இடம்பெற்ற நேரத்தில் சுற்றுலாப் பயணிகள் கப்பலில் சுமார் 129 பயணிகளும், கப்பல் பணியாளர்களும் இருந்ததாக நியூ ஆர்லியன்ஸ் துறைமுக அதிகாரிகள் தெரிவித்துள்ளனர்.
சரக்குக் கப்பல் பலமாக மோதியதைத் தொடர்ந்து, அமெரிக்கன் ஹெரிடேஜ் கப்பல் ஒருபக்கமாகச் சாய்ந்து நீருக்குள் மூழ்கத் தொடங்கியது. பின்னர் அது முழுமையாக ஒருபக்கமாகக் கவிழ்ந்த நிலையில் காணப்பட்டது. இதனால் கப்பலில் இருந்த பயணிகள் உயிர் பாதுகாப்பு அங்கிகளை அணிந்துகொண்டு நீருக்குள் இறங்கியதுடன், சிலர் கப்பலின் பிடிப்புப் பகுதிகளைப் பற்றிக்கொண்டு உதவிக்காகக் காத்திருந்தனர்.
உடனடியாக முன்னெடுக்கப்பட்ட மீட்பு நடவடிக்கை
விபத்து தொடர்பான அவசர அழைப்புகள் கிடைத்ததும், நியூ ஆர்லியன்ஸ் தீயணைப்புப் படையினர், பொலிஸார், துறைமுகக் காவல்துறையினர், அமெரிக்க கடலோரக் காவல்படையினர் மற்றும் அவசர மருத்துவப் பிரிவினர் சம்பவ இடத்திற்கு விரைந்துள்ளனர்.
அத்துடன், ஆற்றில் பயணித்துக்கொண்டிருந்த இழுவைப் படகுகள் மற்றும் ஏனைய தனியார் படகுகளின் நடத்துநர்களும் மீட்பு நடவடிக்கைகளில் இணைந்துள்ளனர். நீரில் தத்தளித்த பயணிகளைப் பாதுகாப்பாக மீட்பதற்கு அருகிலிருந்த படகுகள் பெரிதும் உதவியதாக அதிகாரிகள் தெரிவித்துள்ளனர்.
மீட்கப்பட்ட பயணிகள் நியூ ஆர்லியன்ஸ் துறைமுக நிர்வாகக் கட்டடத்திற்கு அழைத்துச் செல்லப்பட்டு, அங்கு ஆரம்ப மருத்துவப் பரிசோதனைகள் மற்றும் தேவையான உதவிகள் வழங்கப்பட்டுள்ளன.
இந்த மீட்பு நடவடிக்கையின் முடிவில், கப்பலில் இருந்த அனைத்து பயணிகளும் பணியாளர்களும் கணக்கெடுக்கப்பட்டு பாதுகாப்பாக இருப்பது உறுதிப்படுத்தப்பட்டது. எனினும், விபத்தில் காயமடைந்த 32 பயணிகள் மேலதிக சிகிச்சைக்காக வைத்தியசாலைகளில் அனுமதிக்கப்பட்டுள்ளனர். அவர்களில் எவரும் உயிருக்கு ஆபத்தான நிலையில் இல்லை என நியூ ஆர்லியன்ஸ் மேயர் ஹெலினா மொரேனோ தெரிவித்துள்ளார்.
இந்த மீட்பு நடவடிக்கையை அதிகாரிகள் “மிசிசிப்பியில் நிகழ்ந்த ஓர் அற்புதம்” என வர்ணித்துள்ளனர். பாரிய கப்பல் விபத்து இடம்பெற்ற போதிலும் உயிரிழப்புகள் ஏற்படாமல் அனைத்து பயணிகளையும் மீட்க முடிந்தமை குறிப்பிடத்தக்கதாகும்.
கப்பலின் திசைதிருப்பும் கட்டுப்பாட்டில் கோளாறு ஏற்பட்டதா?
விபத்துக்கான சரியான காரணம் இதுவரை உறுதிப்படுத்தப்படவில்லை. எனினும், சரக்குக் கப்பலின் திசைதிருப்பும் கட்டுப்பாட்டு அமைப்பில் (Steering System) ஏதேனும் கோளாறு ஏற்பட்டிருக்கலாம் என்ற சந்தேகம் நிலவுவதாக அமெரிக்க கடலோரக் காவல்படையின் அதிகாரி கப்டன் மெலனி பர்ன்ஹாம் தெரிவித்துள்ளார்.
சரக்குக் கப்பல் தனது கட்டுப்பாட்டை இழந்து சுற்றுலாப் பயணிகள் கப்பலுடன் மோதியதாக நியூ ஆர்லியன்ஸ் மேயர் குறிப்பிட்டுள்ளார். இருப்பினும், திசைதிருப்பும் அமைப்பில் ஏற்பட்டதாகக் கூறப்படும் கோளாறு விபத்துக்கான உறுதியான காரணமாக இதுவரை அறிவிக்கப்படவில்லை.
சம்பவம் தொடர்பான விசாரணைகளை அமெரிக்க கடலோரக் காவல்படையினர் முன்னெடுத்து வருகின்றனர். மேலும், அமெரிக்க தேசிய போக்குவரத்துப் பாதுகாப்புச் சபை (NTSB) விசாரணைக்குழுவொன்றை சம்பவ இடத்திற்கு அனுப்பி, விபத்துக்கான காரணங்களைக் கண்டறிய நடவடிக்கை எடுத்துள்ளது.
மிசிசிப்பி ஆற்றின் போக்குவரத்து தற்காலிகமாக நிறுத்தம்
மீட்பு நடவடிக்கைகள் மற்றும் பாதுகாப்பு மதிப்பீடுகளை முன்னெடுப்பதற்காக, மிசிசிப்பி ஆற்றின் குறிப்பிட்ட பகுதியில் கப்பல் போக்குவரத்து தற்காலிகமாக நிறுத்தப்பட்டுள்ளது.
ஆற்றின் 93ஆவது மைல் குறியீட்டுக்கும் 96ஆவது மைல் குறியீட்டுக்கும் இடைப்பட்ட பகுதியில் கப்பல்கள் பயணிக்க அமெரிக்க கடலோரக் காவல்படை தடை விதித்துள்ளது. இதனால் அப்பகுதியில் வழக்கமான நீர்வழிப் போக்குவரத்தும் பாதிக்கப்பட்டது.
எட்டு நாள் சுற்றுலாப் பயணத்தின் இறுதியில் விபத்து
2015ஆம் ஆண்டு கட்டப்பட்ட அமெரிக்கன் ஹெரிடேஜ் கப்பல் ஐந்து தளங்களைக் கொண்ட சுற்றுலாப் பயணிகள் கப்பலாகும். சுமார் 150 பயணிகளை ஏற்றிச் செல்லும் வசதியைக் கொண்ட இந்தக் கப்பல், அமெரிக்காவின் லூசியானா மற்றும் மிசிசிப்பி பகுதிகளை உள்ளடக்கிய எட்டு நாள் சுற்றுலாப் பயணத்தை நிறைவு செய்யும் தருவாயில் இந்த விபத்தை எதிர்கொண்டுள்ளது.
விபத்தினால் பாதிக்கப்பட்ட பயணிகளுக்கு தங்குமிடம் மற்றும் போக்குவரத்து உள்ளிட்ட உதவிகளை வழங்குவதற்கும் நடவடிக்கை எடுக்கப்பட்டுள்ளது. லூசியானா மாநிலத்தின் துணை ஆளுநர் பில்லி நன்கெஸர், பாதிக்கப்பட்ட பயணிகளுக்காக 85 ஹோட்டல் அறைகளை ஏற்பாடு செய்துள்ளதாகவும் தகவல்கள் தெரிவிக்கின்றன.
பாரிய கப்பல் மோதல் மற்றும் கவிழ்தல் சம்பவம் இடம்பெற்ற போதிலும், பயணிகள் மற்றும் பணியாளர்கள் அனைவரும் உயிருடன் மீட்கப்பட்டமை நிம்மதியை ஏற்படுத்தியுள்ளது. இதேவேளை, சரக்குக் கப்பலின் கட்டுப்பாட்டில் ஏற்பட்டிருக்கக்கூடிய கோளாறு உள்ளிட்ட அனைத்து சாத்தியமான காரணங்களையும் ஆராய்ந்து விசாரணைகள் தொடர்ந்து முன்னெடுக்கப்பட்டு வருகின்றன.





