மத்திய ஆபிரிக்காவில் பரவி வரும் எபோலா வைரஸ் தொற்று தொடர்பாக, உலக சுகாதார அமைப்பின் (WHO) தலைவர் Tedros Adhanom Ghebreyesus கவலை வெளியிட்டுள்ளார்.
ஜெனீவாவில் நடைபெற்ற ஊடக சந்திப்பில் பேசிய அவர், எபோலா வைரஸ் பரவல் ஆரம்பத்திலேயே பெரும் முன்னிலை பெற்றுள்ளதாகவும், சுகாதார அதிகாரிகள் தற்போது அதனை கட்டுப்படுத்தும் முயற்சியில் பின்னடைந்த நிலையிலேயே உள்ளதாகவும் தெரிவித்தார்.
காங்கோ ஜனநாயகக் குடியரசின் கிழக்குப் பகுதியில் அமைந்துள்ள Ituri Province மாகாணத்திற்கு விஜயம் செய்த பின்னர் கருத்து வெளியிட்ட அவர், அங்கு அதிகாரிகள் தீவிரமாக செயல்பட்டு வருவதாகவும், ஆனால் வைரஸ் இன்னும் முன்னிலையில் இருப்பதாகவும் கூறினார்.
தற்போதைய பரவல் அரிதான Bundibugyo வகை எபோலா வைரஸால் ஏற்படுவதாக தெரிவிக்கப்பட்டுள்ளது. இந்த வகை வைரஸுக்கு இதுவரை அங்கீகரிக்கப்பட்ட மருந்தோ தடுப்பூசியோ இல்லை.
மே மாத நடுப்பகுதியில் தொடங்கிய இந்த பரவலில், காங்கோவில் இதுவரை 344 தொற்றாளர்கள் உறுதிப்படுத்தப்பட்டுள்ளதுடன், 60 பேர் உயிரிழந்துள்ளனர். மேலும், சந்தேகத்திற்குரிய நோயாளிகளின் எண்ணிக்கை 906 இலிருந்து 166 ஆக குறைந்துள்ளதாக தெரிவிக்கப்பட்டுள்ளது.
இதற்கிடையில், எபோலா பரவலை எதிர்கொள்ள அமெரிக்கா, கென்யாவில் தனிமைப்படுத்தல் நிலையம் ஒன்றை அமைக்கும் திட்டம் அரசியல் சர்ச்சையை ஏற்படுத்தியுள்ளது.
காங்கோவுக்கு பயணம் செய்த அமெரிக்கர்களை தனிமைப்படுத்தும் நோக்கில் இந்த மையம் அமைக்கப்படுவதாக கூறப்படுகின்ற நிலையில், கென்யாவில் பலர் எதிர்ப்பு தெரிவித்து வருகின்றனர். எனினும், கென்ய சுகாதார அமைச்சர் Aden Duale, இந்த திட்டம் தொடரும் என நாடாளுமன்றத்தில் உறுதிப்படுத்தியுள்ளார்.
எபோலா பரவலை கட்டுப்படுத்துவதற்காக பரிசோதனை திறனை அதிகரித்தல், நோயாளிகளுடன் தொடர்பில் இருந்தவர்களை தனிமைப்படுத்தல் மற்றும் Bundibugyo வகைக்கு சிகிச்சை கண்டறியும் ஆய்வுகள் தற்போது தீவிரப்படுத்தப்பட்டுள்ளன.
