மட்டக்களப்பு மாவட்ட நாடாளுமன்ற உறுப்பினர் சாணக்கியன் இராசமாணிக்கம், பாசிக்குடா சுற்றுலா வலயத்தில் இயங்கும் ஹோட்டல்கள் பல ஆண்டுகளாக உள்ளூராட்சி சபைக்கு செலுத்த வேண்டிய 1% சட்டபூர்வ வரியை செலுத்தவில்லை என்ற குற்றச்சாட்டுகள் தொடர்பில் உடனடி விசாரணை நடத்த வேண்டும் என கோரிக்கை விடுத்துள்ளார்.
பாராளுமன்றத்தில் உரையாற்றிய அவர், பாசிக்குடா பகுதியில் உள்ள 17 ஹோட்டல்கள், இலங்கை சுற்றுலா அபிவிருத்தி அதிகார சபைக்கு (SLTDA) கட்டணங்களை செலுத்துகின்ற போதிலும், உள்ளூராட்சி சபைக்கு வழங்க வேண்டிய கட்டாய வரிகளை செலுத்தவில்லை எனக் கூறப்படும் குற்றச்சாட்டுகள் குறித்து கவனம் செலுத்தினார்.
இந்த குற்றச்சாட்டுகள் நிரூபிக்கப்பட்டால், அது உள்ளூர் உட்கட்டமைப்பு, சுகாதார வசதிகள், பொது சேவைகள் மற்றும் சமூக அபிவிருத்திக்காக பயன்படுத்த வேண்டிய பெருமளவான அரச வருவாய் இழப்பை ஏற்படுத்தும் என அவர் தெரிவித்தார்.
வடக்கு மற்றும் கிழக்கு மாகாணங்களில் சுற்றுலா வளர்ச்சிக்கு போதிய நிதி ஒதுக்கீடுகள் 2018ஆம் ஆண்டுக்குப் பின்னர் வழங்கப்படவில்லை எனவும், இப்பகுதிகளில் உள்ள சுற்றுலா வாய்ப்புகள் முழுமையாக பயன்படுத்தப்படவில்லை எனவும் அவர் குறிப்பிட்டார்.
மேலும், பாசிக்குடா SLTDA அலுவலகத்தில் பணியாற்றும் அதிகாரி ஒருவர் தகவல் கோரிக்கைகளுக்கு ஒத்துழைக்கவில்லை என்றும், சில ஹோட்டல் இயக்குநர்களின் நலன்களுக்கு ஆதரவாக செயல்பட்டதாகவும் குற்றம் சாட்டிய அவர், இது தொடர்பாக சுயாதீன விசாரணை அவசியம் என தெரிவித்தார்.
சுற்றுலா அமைச்சு, SLTDA, உள்ளூராட்சி அமைச்சு, கணக்காய்வாளர் நாயகம் மற்றும் சம்பந்தப்பட்ட நிறுவனங்கள் இணைந்து:
செலுத்தப்படாத வரிகளை மீளப் பெறுதல்
சட்ட மீறல்களை கண்டறிதல்
பொறுப்பானவர்களுக்கு எதிராக சட்ட நடவடிக்கை எடுக்குதல்
என விரிவான விசாரணை மேற்கொள்ள வேண்டும் என சாணக்கியன் எம்.பி. கோரிக்கை விடுத்துள்ளார்.
