கொழும்பு, ஆகஸ்ட் 13, 2026 – இஸ்ரேலில் வேலைவாய்ப்புகளை பெற்றுத்தருவதாகக் கூறி போலி வேலை ஒப்பந்தங்களை தயாரித்து வந்ததாக சந்தேகிக்கப்படும் மோசடி நடவடிக்கை ஒன்று இலங்கை வெளிநாட்டு வேலைவாய்ப்பு பணியகத்தில் (SLBFE) கண்டுபிடிக்கப்பட்டுள்ளது.
இந்த சம்பவம் தொடர்பில் இருவர் நேற்று (12) கைது செய்யப்பட்டுள்ளனர்.
SLBFE-ன் தகவலின்படி, சந்தேகநபர்கள் சிலரை பணியகத்திற்கு அழைத்து வந்து, இஸ்ரேலில் வேலைவாய்ப்பு பெற்றுத்தருவதாகக் கூறி போலி வேலை ஒப்பந்தங்களை வழங்க முயன்றுள்ளனர்.
பணியகத்தின் முதல் மாடியில் வைத்து சந்தேகநபர்கள் கைது செய்யப்பட்டதுடன், அவர்களிடமிருந்து 7 வெளிநாட்டு கடவுச்சீட்டுகள் மற்றும் இஸ்ரேல் வேலைவாய்ப்புகள் தொடர்பானதாக தயாரிக்கப்பட்ட பல போலி ஆவணங்களும் பொலிஸாரால் கைப்பற்றப்பட்டுள்ளன.
கைது செய்யப்பட்ட இருவரும் இன்று (13) கடுவெல நீதவான் நீதிமன்றத்தில் முன்னிலைப்படுத்தப்பட உள்ளனர்.
சம்பவம் தொடர்பில் இலங்கை வெளிநாட்டு வேலைவாய்ப்பு பணியகம் மேலதிக விசாரணைகளை ஆரம்பித்துள்ளது.
வெளிநாட்டு வேலைவாய்ப்புகளை பெற்றுத்தருவதாகக் கூறி போலி ஆவணங்கள் மூலம் பொதுமக்களை ஏமாற்றும் நடவடிக்கைகள் தொடர்பில் அதிகாரிகள் தொடர்ந்து விசாரணைகளை முன்னெடுத்து வருகின்றனர்.
(Newswire)
