ஜனாதிபதி தேர்தலையும் பொதுத் தேர்தலையும் ஒத்திவைப்பதற்கான எந்தவொரு நடவடிக்கையும் அரசாங்கத்திடம் இல்லை என ஜனாதிபதி அனுர குமார திஸாநாயக்க தெரிவித்துள்ளார்.

புலத்சிங்கள பகுதியில் நடைபெற்ற தேசிய மக்கள் சக்தியின் பொதுக்கூட்டத்தில் உரையாற்றிய ஜனாதிபதி, நாட்டின் தேர்தல்கள் திட்டமிட்ட கால அட்டவணைக்கு அமைய நடத்தப்படும் என உறுதியளித்தார்.

2024ஆம் ஆண்டு ஜனாதிபதி தேர்தலிலும், அதனைத் தொடர்ந்து நடைபெற்ற பொதுத் தேர்தலிலும் மக்கள் வழங்கிய ஆணையின் அடிப்படையில் தற்போதைய அரசாங்கம் செயற்பட்டு வருவதாக அவர் தெரிவித்தார்.

கடந்த காலங்களில் நாட்டில் நிலவிய அரசியல், பொருளாதார மற்றும் நிர்வாக முறைகளில் மாற்றத்தை ஏற்படுத்தும் நோக்கில் மக்கள் தற்போதைய அரசாங்கத்திற்கு அதிகாரத்தை வழங்கியுள்ளதாகவும் ஜனாதிபதி குறிப்பிட்டார்.

அரச வருமானத்தை அதிகரிக்க நடவடிக்கை

அரச நிதியை முறையாக நிர்வகிப்பதற்கும், அரச வருமானம் முறைகேடான வழிகளில் வெளியேறுவதைத் தடுப்பதற்கும் அரசாங்கம் நடவடிக்கை எடுத்துள்ளதாக ஜனாதிபதி தெரிவித்தார்.

2025ஆம் ஆண்டில் மொத்த உள்நாட்டு உற்பத்தியுடன் ஒப்பிடுகையில் அரசாங்க வருமானம் 16.7 சதவீதத்தை எட்டியுள்ளதாகவும், இது கடந்த மூன்று தசாப்தங்களில் பதிவான உயர்ந்த மட்டமாகும் என்றும் அவர் கூறினார்.

அரச செலவினங்களை கட்டுப்படுத்தியதன் மூலம் 1957ஆம் ஆண்டுக்குப் பின்னர் நாட்டில் பதிவான குறைந்தளவான வரவு-செலவுத் திட்டப் பற்றாக்குறை 2025ஆம் ஆண்டில் ஏற்பட்டதாகவும் ஜனாதிபதி தெரிவித்தார்.

அடுத்த ஆண்டு மூலதன அபிவிருத்தி நடவடிக்கைகளுக்காக 2 டிரில்லியன் ரூபாய் ஒதுக்க திட்டமிடப்பட்டுள்ளதாகவும் அவர் குறிப்பிட்டார்.

மேலும், மாவட்ட மட்டத்தில் அவசர தேவைகளுக்காக ஒவ்வொரு மாவட்டத்திற்கும் 2 பில்லியன் ரூபாய் வரையிலான நிதி ஒதுக்கீட்டை வழங்க நடவடிக்கை எடுக்கப்படவுள்ளதாகவும் ஜனாதிபதி தெரிவித்தார்.

மாணவர்கள் மற்றும் விவசாயிகளுக்கான உதவிகள்

பல்கலைக்கழக மாணவர்களுக்கான மஹாபொல உதவித்தொகை 5,000 ரூபாயிலிருந்து 10,000 ரூபாயாக அதிகரிக்கப்பட்டுள்ளதாக ஜனாதிபதி கூறினார்.

விவசாயிகளுக்கான உர மானியமும் 15,000 ரூபாயிலிருந்து 30,000 ரூபாயாக உயர்த்தப்பட்டுள்ளதாக அவர் தெரிவித்தார்.

மாற்றுத்திறனாளிகளுக்கான கொடுப்பனவு அதிகரிக்கப்பட்டுள்ளதுடன், முதியோருக்கான உதவிகளும் விரிவுபடுத்தப்பட்டுள்ளதாக ஜனாதிபதி குறிப்பிட்டார்.

பராமரிப்பு இல்லங்களில் வசிக்கும் சிறார்களுக்கு மாதாந்தம் 5,000 ரூபாய் வழங்கப்படுவதாகவும், அவர்கள் 18 வயதை அடைந்து இல்லத்திலிருந்து வெளியேறும் போது வீடு அமைப்பதற்காக 2 மில்லியன் ரூபாய் வழங்கும் திட்டம் நடைமுறையில் உள்ளதாகவும் அவர் தெரிவித்தார்.

மேலும், 17 இலட்சம் பாடசாலை மாணவர்களுக்கு கல்வி உபகரணங்களை கொள்வனவு செய்வதற்காக தலா 6,000 ரூபாய் வழங்கப்பட்டுள்ளதாக ஜனாதிபதி கூறினார்.

பேரிடர் மற்றும் எரிபொருள் நெருக்கடிகளுக்கு நடவடிக்கை

‘டித்வா’ சூறாவளியால் ஏற்பட்ட பாதிப்புகளை சமாளிப்பதற்காக பாதிக்கப்பட்ட மக்களுக்கு பல்வேறு நிவாரணங்கள் வழங்கப்பட்டுள்ளதாக ஜனாதிபதி தெரிவித்தார்.

சேதமடைந்த வீடுகளை மீளக் கட்டுவதற்கான நிதி, கால்நடைகளை இழந்தவர்களுக்கான இழப்பீடுகள் மற்றும் விவசாயிகளுக்கான உதவிகள் வழங்கப்பட்டுள்ளதாகவும் அவர் கூறினார்.

மத்திய கிழக்கு மோதல் காரணமாக சர்வதேச எரிபொருள் மற்றும் மின்சார விலைகள் அதிகரித்த போதிலும், நாட்டில் எரிபொருள் வரிசைகள் மற்றும் மின்சாரத் துண்டிப்புகள் ஏற்படாத வகையில் நடவடிக்கை எடுக்கப்பட்டதாகவும் ஜனாதிபதி தெரிவித்தார்.

எரிபொருள் மற்றும் மின்சார மானியங்களுக்காக அரசாங்கம் 100 பில்லியன் ரூபாய் ஒதுக்கியதாகவும் அவர் குறிப்பிட்டார்.

ஊழலுக்கு எதிரான நடவடிக்கைகள்

அரச நிறுவனங்களில் இடம்பெறும் ஊழல் மற்றும் நிதி முறைகேடுகளை கட்டுப்படுத்துவதற்கான நடவடிக்கைகள் தொடர்ந்து முன்னெடுக்கப்படுவதாக ஜனாதிபதி தெரிவித்தார்.

நாட்டிலிருந்து சட்டவிரோதமாக பெருமளவு அமெரிக்க டொலர்கள் வெளியேற்றப்பட்ட சம்பவங்கள் தொடர்பில் விசாரணைகள் முன்னெடுக்கப்பட்டுள்ளதாகவும், இதனுடன் தொடர்புடைய சில வங்கி அதிகாரிகள் உள்ளிட்டோர் கைது செய்யப்பட்டுள்ளதாகவும் அவர் கூறினார்.

நீண்டகாலமாக நிலுவையில் உள்ள குற்ற வழக்குகளை விரைவாக விசாரணைக்கு கொண்டு வருவதற்காக குற்றப் புலனாய்வுத் திணைக்களத்தின் செயற்பாடுகள் வலுப்படுத்தப்படுவதாகவும் ஜனாதிபதி தெரிவித்தார்.

அரசாங்க பகுப்பாய்வுத் திணைக்களத்தின் அறிக்கை தயாரிப்பு திறனும் அதிகரிக்கப்பட்டுள்ளதாக அவர் குறிப்பிட்டார்.

போதைப்பொருள் மற்றும் பாதாள உலகத்திற்கு எதிராக நடவடிக்கை

நாட்டில் போதைப்பொருள் மற்றும் பாதாள உலக செயற்பாடுகளை ஒழிப்பதற்காக விசேட நடவடிக்கைகள் முன்னெடுக்கப்பட்டு வருவதாக ஜனாதிபதி தெரிவித்தார்.

கடந்த இரண்டு ஆண்டுகளில் பெருமளவிலான ஹெரோயின், கொக்கெய்ன், ‘ஐஸ்’ உள்ளிட்ட போதைப்பொருட்கள் மற்றும் போதை மாத்திரைகள் கைப்பற்றப்பட்டுள்ளதாக அவர் கூறினார்.

வெளிநாடுகளுக்கு தப்பிச் சென்றதாகக் கூறப்படும் 74 முக்கிய பாதாள உலக உறுப்பினர்கள் மீண்டும் இலங்கைக்கு அழைத்து வரப்பட்டுள்ளதாகவும் ஜனாதிபதி தெரிவித்தார்.

போதைப்பொருள் வர்த்தகத்துடன் தொடர்புடையதாக அடையாளம் காணப்பட்ட சுமார் 6 பில்லியன் ரூபாய் பெறுமதியான பேருந்துகள், தோட்டங்கள், காணிகள் மற்றும் கட்டிடங்கள் அரசுடமையாக்கப்பட்டுள்ளதாகவும் அவர் குறிப்பிட்டார்.

புதிய அதிவேக நெடுஞ்சாலைகள்

அடுத்த ஆண்டு மூன்று முக்கிய அதிவேக நெடுஞ்சாலைத் திட்டங்களை ஆரம்பிக்க திட்டமிடப்பட்டுள்ளதாக ஜனாதிபதி தெரிவித்தார்.

கலஹேதர–ரம்புக்கனை, இங்கிரிய–பாதுக்க மற்றும் குருநாகல்–கலேவெல ஆகிய பகுதிகளை இணைக்கும் நெடுஞ்சாலைத் திட்டங்கள் இதில் அடங்குவதாக அவர் கூறினார்.

இந்தத் திட்டங்களுக்கு வெளிநாட்டு கடன்களைப் பயன்படுத்தாமல் அரச நிதியை பயன்படுத்த திட்டமிடப்பட்டுள்ளதாகவும் ஜனாதிபதி தெரிவித்தார்.

ரயில் சேவை மின்மயமாக்கல்

இலங்கையின் ரயில் பாதைகளை மின்மயமாக்கும் திட்டமும் ஆரம்பிக்கப்படவுள்ளதாக ஜனாதிபதி தெரிவித்தார்.

முதற்கட்டமாக பாணந்துறை–மருதானை, நீர்கொழும்பு–மருதானை மற்றும் ராகம–மருதானை ரயில் பாதைகளில் மின்மயமாக்கல் பணிகளை முன்னெடுக்க நடவடிக்கை எடுக்கப்பட்டுள்ளதாக அவர் கூறினார்.

இதற்கான டெண்டர் நடவடிக்கைகள் நவம்பர் மாதத்தில் ஆரம்பிக்க திட்டமிடப்பட்டுள்ளதாகவும் ஜனாதிபதி தெரிவித்தார்.

அரச சேவைகள் டிஜிட்டல் மயமாக்கப்படும்

அரச சேவைகளை டிஜிட்டல் முறைக்கு மாற்றுவதற்காக அடுத்த ஆண்டு 30 பில்லியன் ரூபாய் ஒதுக்க திட்டமிடப்பட்டுள்ளதாக ஜனாதிபதி கூறினார்.

இதன் மூலம் பிறப்பு மற்றும் இறப்பு சான்றிதழ்கள், காணி ஆவணங்கள், வருமான அனுமதிப்பத்திரங்கள் உள்ளிட்ட பல அரச சேவைகளை மக்கள் வீட்டிலிருந்தே கையடக்கத் தொலைபேசி மூலம் பெற்றுக்கொள்ளும் வசதி ஏற்படுத்தப்படும் என அவர் தெரிவித்தார்.

நாடு முழுவதும் 4G சேவையை விரிவுபடுத்துவதற்காக அடுத்த மூன்று ஆண்டுகளில் 1,000 புதிய 4G கோபுரங்களை அமைக்க திட்டமிடப்பட்டுள்ளதாகவும் அவர் குறிப்பிட்டார்.

தொழிற்கல்விக்காக புதிய பல்கலைக்கழகங்கள்

நாட்டின் பாரம்பரிய பல்கலைக்கழகக் கல்விக்கு மேலதிகமாக தொழிற்கல்வியை விரிவுபடுத்த 50 புதிய தொழிற்கல்வி பல்கலைக்கழகங்களை உருவாக்க திட்டமிடப்பட்டுள்ளதாக ஜனாதிபதி தெரிவித்தார்.

களுத்துறை மாவட்டத்தில் மட்டும் இரண்டு தொழிற்கல்வி பல்கலைக்கழகங்கள் அமைக்கப்படவுள்ளதாகவும் அவர் கூறினார்.

இதன் மூலம் உயர்தரப் பரீட்சையை நிறைவு செய்யும் மாணவர்கள் தங்களது விருப்பத்திற்கு ஏற்ப பாரம்பரிய பல்கலைக்கழகம் அல்லது தொழிற்கல்வி பல்கலைக்கழகத்தைத் தெரிவுசெய்யக்கூடிய வாய்ப்பு ஏற்படும் என ஜனாதிபதி தெரிவித்தார்.

தேர்தல்கள் ஒத்திவைக்கப்படாது

இதனிடையே, ஜனாதிபதி தேர்தலை ஒத்திவைப்பதற்காக சர்வஜன வாக்கெடுப்பு நடத்தப்படவுள்ளதாக வெளியாகும் கருத்துக்கள் உண்மையற்றவை என ஜனாதிபதி தெரிவித்தார்.

ஜனாதிபதி தேர்தலும் பொதுத் தேர்தலும் எந்தவிதத்திலும் ஒத்திவைக்கப்படாது என்றும், அவை திட்டமிட்ட காலத்திற்கு ஏற்ப நடத்தப்படும் என்றும் அவர் உறுதியளித்தார்.

மாகாண சபைத் தேர்தல்களை நடத்துவதற்கு தற்போது தேர்தல் முறை தொடர்பான சட்டரீதியான சிக்கல்கள் காணப்படுவதாகவும், நாடாளுமன்றத்தில் அனைத்து தரப்பினரும் ஏற்றுக்கொள்ளக்கூடிய தேர்தல் முறை தொடர்பில் தீர்மானம் எடுக்கப்பட்ட பின்னர் மாகாண சபைத் தேர்தல்களையும் நடத்த நடவடிக்கை எடுக்கப்படும் எனவும் ஜனாதிபதி தெரிவித்தார்.

அரசியல் அதிகாரத்தை நீண்டகாலம் தக்கவைத்துக் கொள்வதற்காக மக்களை ஏமாற்றும் எந்த நடவடிக்கையையும் அரசாங்கம் மேற்கொள்ளாது எனவும் ஜனாதிபதி அனுர குமார திஸாநாயக்க மேலும் தெரிவித்துள்ளார்.