காலி பகுதியில் இரண்டு பிள்ளைகளை பாடசாலையில் சேர்ப்பதற்காக இலஞ்சம் பெற்றதாகக் கூறப்படும் பாடசாலை அதிபர் ஒருவர் கைது செய்யப்பட்டுள்ளார்.
இலஞ்சம் அல்லது ஊழல் தொடர்பான விசாரணைகளை முன்னெடுக்கும் அதிகாரிகளால் குறித்த அதிபர் கைது செய்யப்பட்டுள்ளதாகத் தெரிவிக்கப்பட்டுள்ளது.
விசாரணைகளின்படி, இரண்டு பிள்ளைகளையும் பாடசாலையில் சேர்ப்பதற்காக ஆரம்பத்தில் ஒரு பிள்ளைக்கு 3 இலட்சம் ரூபாய் வீதம், மொத்தமாக 6 இலட்சம் ரூபாய் கோரப்பட்டதாகத் தெரிவிக்கப்படுகிறது.
பின்னர் அந்தத் தொகை 3 இலட்சம் ரூபாயாகக் குறைக்கப்பட்டதாகவும், அதில் 1.5 இலட்சம் ரூபாய் பெற்றுக்கொண்டு ஒரு பிள்ளையை 2026ஆம் ஆண்டுக்கான முதலாம் தரத்தில் சேர்ப்பதற்கான நடவடிக்கைகள் மேற்கொள்ளப்பட்டதாகவும் விசாரணைகளில் தெரியவந்துள்ளது.
அதேபோன்று, மற்றைய பிள்ளையை 8ஆம் தரத்தில் சேர்ப்பதற்காக மேலும் 50,000 ரூபாய் பெற்றுக்கொள்ளப்பட்டதாகவும் தெரிவிக்கப்படுகிறது.
இவ்வாறு இரண்டு பிள்ளைகளையும் பாடசாலையில் சேர்ப்பதற்கான நடவடிக்கைகளை மேற்கொண்ட பின்னர், அதற்காக மேலும் 2.5 இலட்சம் ரூபாய் கோரப்பட்டதாகக் கூறப்படுகிறது.
குறித்த பணத்தை வழங்காவிட்டால் இரண்டு பிள்ளைகளையும் பாடசாலையிலிருந்து நீக்கிவிடுவதாக அதிபர் எச்சரித்ததாகவும் தகவல்கள் தெரிவிக்கின்றன.
இதனையடுத்து, கோரப்பட்ட 2.5 இலட்சம் ரூபாய் இலஞ்சத் தொகையைப் பெற்றுக்கொள்ள முயன்ற சந்தர்ப்பத்திலேயே சந்தேகநபரான அதிபர் கைது செய்யப்பட்டுள்ளார்.
கைது செய்யப்பட்ட அதிபர் காலி நீதவான் நீதிமன்றத்தில் முன்னிலைப்படுத்தப்படவுள்ளார் எனத் தெரிவிக்கப்பட்டுள்ளது.
குறிப்பு: நீதிமன்ற நடவடிக்கைகள் நிறைவடையும் வரை சந்தேகநபர் தொடர்பான குற்றச்சாட்டுகள் நிரூபிக்கப்பட்டவை எனக் கருதப்படாது.
