இலங்கைக்கு உத்தியோகபூர்வ விஜயம் மேற்கொண்டுள்ள இந்திய பாதுகாப்பு அமைச்சர் ராஜ்நாத் சிங், ஜனாதிபதி அநுர குமார திசாநாயக்கவை இன்று சந்தித்து இருதரப்பு கலந்துரையாடல்களை மேற்கொண்டுள்ளார்.
இந்த சந்திப்பின்போது இந்தியா–இலங்கை பாதுகாப்பு ஒத்துழைப்பை மேலும் வலுப்படுத்தும் வகையில் மூன்று முக்கிய ஒப்பந்தங்கள் பரிமாறப்படவுள்ளன என வெளிவிவகார அமைச்சர் விஜித ஹேரத் தெரிவித்துள்ளார்.
🔹 மூன்று முக்கிய ஒப்பந்தங்கள்
1️⃣ தேசிய கெடட் படையணி ஒத்துழைப்பு
இலங்கை மற்றும் இந்திய தேசிய கெடட் படையணிகளுக்கு இடையே பயிற்சிகள், பரஸ்பர பரிமாற்றங்கள் மற்றும் கூட்டு நிகழ்ச்சிகளை முன்னெடுப்பதற்கான புரிந்துணர்வு ஒப்பந்தம்.
2️⃣ பாதுகாப்புக் கல்லூரிகளுக்கு இடையிலான ஒத்துழைப்பு
இலங்கையின் தேசிய பாதுகாப்புக் கல்லூரி மற்றும் இந்தியாவின் தேசிய பாதுகாப்புக் கல்லூரிக்கு இடையே அறிவுப் பரிமாற்றம், பயிற்றுநர் பரிமாற்றம் மற்றும் பாதுகாப்புக் கல்வி தொடர்பான ஒத்துழைப்பை மேம்படுத்தும் ஒப்பந்தம்.
3️⃣ வான் பாதுகாப்பு ஆயுதங்களுக்கான இலவச பராமரிப்பு
2000–2006 காலப்பகுதியில் இந்தியாவினால் இலங்கை விமானப்படைக்கு வழங்கப்பட்ட 24 L70 40mm வான் பாதுகாப்பு ஆயுதங்களில், ஏற்கனவே 18 ஆயுதங்களுக்கு இலவச பராமரிப்பு மேற்கொள்ளப்பட்டுள்ளது.
மீதமுள்ள 6 L70 ஆயுதங்களுக்கும் இந்தியாவின் உதவியுடன் இலவச பராமரிப்பு வழங்குவதற்கான ஒப்பந்தம் மேற்கொள்ளப்படவுள்ளது.
ராஜ்நாத் சிங்கின் இலங்கை விஜயம் செப்டெம்பர் 8 முதல் 10 வரை மூன்று நாட்கள் இடம்பெறுகிறது. 38 ஆண்டுகளுக்குப் பின்னர் இந்திய பாதுகாப்பு அமைச்சர் ஒருவர் இலங்கைக்கு மேற்கொள்ளும் உத்தியோகபூர்வ விஜயம் இதுவாகும்.
இந்த விஜயம் பாதுகாப்புத் துறையை மட்டுமன்றி, இந்தியா–இலங்கை இருதரப்பு உறவுகள் மற்றும் பரந்த ஒத்துழைப்பை மேலும் வலுப்படுத்தும் நோக்கத்தையும் கொண்டுள்ளதாக தெரிவிக்கப்பட்டுள்ளது.
