ஆஸ்திரேலிய மாணவர்கள் வகுப்பறைகளில் ஏற்படுத்தும் இடையூறுகள் தொடர்பில் புதிய சர்வதேச கல்வி மதிப்பீட்டில் கவலைக்குரிய தகவல்கள் வெளியாகியுள்ளன.
OECD-யின் 2025 PISA ஆய்வில், 91 நாடுகள் மற்றும் பொருளாதார அமைப்புகளைச் சேர்ந்த 15 வயது மாணவர்கள் மதிப்பீடு செய்யப்பட்டுள்ளனர்.
வகுப்பறை ஒழுக்கம் தொடர்பான குறியீட்டில் மதிப்பிடப்பட்ட 80 கல்வி அமைப்புகளில் ஆஸ்திரேலியா 69ஆவது இடத்தைப் பெற்றுள்ளது.
ஆஸ்திரேலிய மாணவர்களில் 41% பேர், பெரும்பாலான அல்லது அனைத்து விஞ்ஞானப் பாட நேரங்களிலும் வகுப்பறையில் சத்தம் மற்றும் ஒழுங்கின்மை காணப்படுவதாக தெரிவித்துள்ளனர். இது OECD நாடுகளின் சராசரியான 31%-ஐ விட அதிகமாகும்.
மேலும், சுமார் 34% மாணவர்கள் தங்களது வகுப்பு நண்பர்கள் ஆசிரியர்கள் கூறுவதை கவனிப்பதில்லை என தெரிவித்துள்ளனர். அதேவேளை, 21% பேர் பெரும்பாலான அல்லது அனைத்து பாட நேரங்களிலும் மாணவர்கள் முறையாக இணைந்து செயற்பட முடியாத நிலை காணப்படுவதாக கூறியுள்ளனர்.
📱 டிஜிட்டல் சாதனங்களும் கவலையாக மாறுகின்றன
வகுப்பறைகளில் கையடக்கத் தொலைபேசிகள் உள்ளிட்ட டிஜிட்டல் சாதனங்களால் ஏற்படும் கவனச்சிதறலும் ஆய்வில் முக்கிய பிரச்சினையாக சுட்டிக்காட்டப்பட்டுள்ளது.
ஆஸ்திரேலிய மாணவர்களில் 39% பேர், விஞ்ஞானப் பாடங்களின்போது தங்களது வகுப்பு நண்பர்கள் டிஜிட்டல் சாதனங்களால் அடிக்கடி கவனம் சிதறுவதாக தெரிவித்துள்ளனர். OECD சராசரி இதற்கு 28% ஆகும்.
பாடசாலையில் கல்வி நோக்கங்களுக்காக டிஜிட்டல் சாதனங்களைப் பயன்படுத்துவதில் ஆஸ்திரேலிய மாணவர்கள் நாளொன்றுக்கு சராசரியாக 2.6 மணிநேரம் செலவிடுகின்றனர். OECD சராசரி 1.7 மணிநேரமாக உள்ளது.
எவ்வாறாயினும், ஆஸ்திரேலிய மாணவர்களின் வகுப்பறை டிஜிட்டல் கவனச்சிதறலுக்கும் அவர்களின் விஞ்ஞானப் பெறுபேறுகளுக்கும் இடையே நேரடி புள்ளிவிவர ரீதியான தொடர்பு இருப்பதை ஆய்வு உறுதிப்படுத்தவில்லை.
🏫 பாடசாலை வருகையிலும் சிக்கல்
பாடசாலை வருகை தொடர்பிலும் கவலைக்குரிய நிலை காணப்பட்டுள்ளது.
PISA மதிப்பீட்டுக்கு முந்தைய இரண்டு வாரங்களில் 44% ஆஸ்திரேலிய மாணவர்கள் குறைந்தது ஒரு நாள் பாடசாலைக்கு செல்லாமல் இருந்ததாக தெரிவித்துள்ளனர். இது OECD சராசரியுடன் ஒப்பிடுகையில் சுமார் இரண்டு மடங்கு என தெரிவிக்கப்பட்டுள்ளது.
இருப்பினும், சர்வதேச அளவில் ஆஸ்திரேலியா தொடர்ந்து வலுவான கல்வி செயல்திறனைக் கொண்ட நாடாகவே காணப்படுகிறது. அதன் கல்வி பெறுபேறுகள் OECD சராசரியை விட உயர்ந்த நிலையில் உள்ளன.
ஆனால், புதிய மதிப்பீட்டில் ஆஸ்திரேலிய மாணவர்களின் வாசிப்பு மற்றும் கணிதப் பெறுபேறுகள், PISA மதிப்பீட்டில் அந்நாடு பங்கேற்கத் தொடங்கிய காலத்திலிருந்து காணப்பட்ட மிகக் குறைந்த மட்டத்திற்கு வீழ்ச்சியடைந்துள்ளன.
இதனிடையே, பாடசாலைகளில் திரை நேரத்தைக் குறைக்க வேண்டியதன் அவசியத்தை ஆஸ்திரேலிய கல்வி அமைச்சர் Jason Clare வலியுறுத்தியுள்ளார். தொழில்நுட்பமும் டிஜிட்டல் திறன்களும் கல்வியில் தொடர்ந்து முக்கிய பங்கு வகிக்கும் எனக் குறிப்பிட்ட அவர், பாடசாலைகளில் “digital detox” தேவைப்படுவதாக தெரிவித்துள்ளார்.
