உச்சநீதிமன்ற நீதிபதிகளின் ஓய்வுபெறும் வயதை 65 இலிருந்து 67 ஆகவும், மேன்முறையீட்டு நீதிமன்ற நீதிபதிகளின் ஓய்வுபெறும் வயதை 63 இலிருந்து 65 ஆகவும் உயர்த்த அரசாங்கம் முன்வைத்துள்ள யோசனை, தேசிய மக்கள் சக்தி (NPP) அரசின் ஒரே கட்சி சர்வாதிகார ஆட்சியை நிறுவும் முயற்சி என எதிர்க்கட்சித் தலைவர் சஜித் பிரேமதாச குற்றம் சாட்டியுள்ளார்.
சமகி வழக்கறிஞர்கள் சங்கம் ஏற்பாடு செய்த பொதுக்கூட்டத்தில் உரையாற்றிய அவர், இந்த திருத்தம் நீதித்துறையின் சுயாதீனத்தை பாதிக்கும், நீதிமன்றங்கள் மீதான மக்களின் நம்பிக்கையை குறைக்கும் மற்றும் ஜனநாயகத்திற்கு அச்சுறுத்தலாக அமையும் என்றார்.
நிறைவேற்று அதிகார ஜனாதிபதி முறையை நீக்காமல், நீதிபதிகளின் ஓய்வுபெறும் வயதை மட்டும் மாற்ற அரசாங்கம் ஏன் அவசரம் காட்டுகிறது என்றும், இது குறித்து நாடாளுமன்றத்தில் கேள்வி எழுப்பியபோது அமைச்சர்கள் மறுப்பு தெரிவித்ததாகவும் அவர் குறிப்பிட்டார்.
Magna Carta, அமெரிக்க அரசியலமைப்பு, மனித உரிமைகள் பற்றிய உலகப் பிரகடனம் உள்ளிட்ட சர்வதேச சட்டக் கொள்கைகளை மேற்கோள்காட்டிய சஜித் பிரேமதாச, அதிகாரப் பிரிவும் நீதித்துறையின் சுயாதீனமுமே ஜனநாயகத்தின் அடித்தளம் என வலியுறுத்தினார்.
தேர்தலின்போது ஜனநாயகத்தைப் பாதுகாப்பதாக உறுதியளித்த ஜனாதிபதி அனுர குமார திசாநாயக்க தலைமையிலான அரசு, தற்போது அதற்கு முரணான நடவடிக்கைகளில் ஈடுபடுவதாகவும் அவர் குற்றஞ்சாட்டினார்.
மேலும், இத்தகைய நடவடிக்கைகள் சர்வதேச நாணய நிதியம் (IMF) மற்றும் ஐரோப்பிய ஒன்றியத்தின் GSP+ சலுகை உள்ளிட்ட விடயங்களில் இலங்கைக்கு பாதிப்பை ஏற்படுத்தக்கூடும் என்றும், இதுகுறித்து மக்கள் விழிப்புணர்வுடன் இருக்க வேண்டும் என்றும் அவர் தெரிவித்தார்.
“நீதித்துறையின் சுயாதீனம் பாதிக்கப்பட்ட காலம் மீண்டும் திரும்ப அனுமதிக்கக் கூடாது” என சஜித் பிரேமதாச வலியுறுத்தினார்.
